Տիրապետում ենք և՛ գրական հայերենին, և՛ այլ բառապաշարի, վիրավորանքը կունենա հակազդեցություն. Արարատ Միրզոյանը զգուշացնում է ՀՀԿ-ին

Երևանի ավագանու Հանրապետական անդամները պետք է հասկանան՝ «Ելք»-ի հետ չի կարելի է այդպես վարվել: Factor.am-ի հետ զրույցում հայտարարեց ԱԺ «Ելք» խմբակցության պատգամավոր Արարատ Միրզոյանը՝ անդրադառնալով երեկ Երևանի ավագանու նիստում տեղի ունեցած միջադեպին, երբ երեք քաղաքական ուժերի ներկայացուցիչները փոխադարձ վիրավորանքներ էին հնչեցնում միմյանց հասցեին:

Ամեն ինչ սկսվել էր այն բանից հետո, երբ ՀՀԿ-ական Արմեն Սահակյանը՝ «Ծիտ» մականունով, Անահիտ Բախշյանին դիմել էր «Անո»-ով և «պարոն Բախշյան»-ով:

«Մեր ֆրակցիայի ներկայացուցիչները ստիպված են եղել շատ կոշտ սաստել և ցույց տալ, որ այդպիսի պահվածք չի կարելի ցույց տալ ավագանու նիստում և «Ելք» դաշինքի նկատմամբ»,- մեզ հետ զրույցում նշեց ընդդիմադիր դաշինքի պատգամավորը:

Մեր դիտարկմանը, որ «Ելք» դաշինքի անդամի կողմից ևս սպառնալիք է հնչել, որ այդ անձին երկու մատով կխեղդի, Արարատ Միրզոյանը պարզաբանեց. «Անի Խաչատրյանն է այդ բառերի հեղինակը, ես խոսել եմ իր հետ, նա ասել է, որ այդ բառերից մի քանի րոպե առաջ նրան մոտեցել է ՀՀԿ-ականներից մեկը և վիրավորել: Նա էլ ստիպված է եղել այդպես պատասխանել»:

Միրզոյանն ընդգծեց՝ իրենք տիրապետում են և՛ գրական հայերենին, և՛ այլ բառապաշարի. «Կարող ենք ինքնապաշտպանվել, թե՛ միջանցքում, թե՛ դրսում, թե՛ նիստերի դահլիճում: Սա պետք է Հանրապետականը հստակ հասկանա: Կլինի վիրավորանք, կլինի հակազդեցություն»:

Մանրամասները՝ տեսանյութում:

Շողիկ Գալստյան