Քաղաքականություն
21.06.2019 | 19:02Գերագույն խորհրդի նախկին պատգամավոր Ազատ Արշակյանը Factor.am-ի հետ զրույցում անդրադառնալով Ռոբերտ Քոչարյանի կալանքի առիթով դատարանի հնարավոր որոշմանը՝ տեսակետ հայտնեց, որ եթե ամբաստանյալը խոչընդոտում է արդարադատության կայացմանը, նրան անպայման պետք է մեկուսացնել։
Նրա խոսքով՝ Ռոբերտ Քոչարյանը պետք է օգնի արդարադատության իրականացմանը, ոչ թե խոչընդոտի, իսկ նրա պահվածքը և ցուցմունք չտալու որոշումը խոչընդոտում են արդարադատությանը։ Արշակյանը հիշեցրեց, որ Քոչարյանը մենակ չի գործել ու պետք է խնդրի դատարան հրավիրել նաև մյուս դերակատարներին. «Բոլորը հիմա դարձել են սուրբ, Ռոբերտ Քոչարյանը՝ հանցագործ»։
Ազատ Արշակյանը չի հավատում, որ Ռոբերտ Քոչարյանի կալանքի հարցը հետաքրքրում է ՌԴ նախագահին: «Ռուսական իմպերիայի հիմնախնդիրների շարքում Քոչարյանի կալանքը Պուտինի համար ո՞րերորդ տեղն է զբաղեցնում։ Եթե Քոչարյանի կալանքը Պուտինին հետաքրքրեր, սրանից մի տարի առաջ Երևանում 1.000 հոգի գնդակահարված կլիներ, ու Ռոբերտ Քոչարյանը 3-րդ անգամ կգար նախագահ։ Ռոբերտ Քոչարյանը Պուտինի տեսադաշտում ընդհանրապես չկա»,- հայտարարեց Արշակյանը։
Ըստ նրա՝ Ռուսաստանն այսօր այն վիճակում չէ, որ կարողանա ճնշել Հայաստանին. «Ռուսաստանին մենք պետք ենք, և իրենք դա գիտակցում են»։
Անդրադառանով Վահե Գրիգորյան-Հրայր Թովմասյան առճակատման ֆոնին ՍԴ-ում քննվող Ռոբերտ Քոչարյանի դիմումի հնարավոր ելքի առիթով հարցին՝ Արշակյանն ասաց. «Հեղափոխոթյունը պետք է առաջին հերթին լուծարեր Սահմանադրական դատարանը»։ Նրա խոսքով՝ ՍԴ դատավորները, որպես վստահելի քաղաքացիներ, իրենք պետք է հրաժարական տային։
Ազատ Արշակյանը Հրայր Թովմասյանին համարում է Սահմանադրության լավ մասնագետ։ «Լավ մասնագետ Հրայր Թովմասյանը ուշացել է։ Առաջինն ինքը պետք է հայտարարեր, որ ՍԴ նախագահը հրաժարական է տալիս և պատրաստ է ծառայել ժողովրդին։ Բոլոր կարևոր պաշտոնյաները պետք է հրաժարական տային՝ և՛ ՍԴ նախագահը, և՛ դատախազը, և՛ պատգամավորները։ Պատգամավորներին հեռացրեցին։ Չպետք է թույլ տային, որ իրենց հեռացնեին, այլ իրենք պետք է վայր դնեին իրենց մանդատները, որովհետև հեղափոխությունն ակնհայտ համաժողովրդական էր։ Նրանք պետք է հանձնվեին»,- ասաց Արշակյանը։
Ըստ նրա՝ Հրայր Թովմասյանը պետք է այդ քայլն աներ, որպես քաղաքացի և մասնագետ և ասեր՝ մենք՝ դատավորները, պատրաստ ենք ծառայել հայրենիքին. «Հիմա բյուրոկրատական խաղեր են։ Բոլոր նրանք, ովքեր չեն միանում հեղափոխությանը, հակահեղափոխական են, սև են կամ սպիտակ։ Սահմանադրական դատարանն ինքն իրեն դարձրել է թիրախ»։
ՍԴ դատավոր ընտրված Վահե Գրիգորյանի՝ ՍԴ նախագահ ընտրվելու հայտարարության առիթով Ազատ Արշակյանն ասաց, որ դա մասնագետների քննարկման տիրույթում է՝ հավելելով. «Եթե ՍԴ դատավորներն անմիջապես չասացին՝ մեր նոր կոլեգան տգետ է, նշանակում է՝ նա ճիշտ է ասում։ Եթե նա ճիշտ է ասում, բա դուք ինչո՞վ եք զբաղված եղել»։
Ինչ վերաբերում է Վահե Գրիգորյանին ուղղված նախկին իշխանության ներկայացուցիչների քննադատությանը, Արշակյանն ասաց. «Նախկին իշխանությունները երկարատև պետք է զրկվեն ձայնի իրավունքից, քանի որ Հայաստանի ինքիշխանությունը հանձնել են»:
Հարցազրույցն ամբողջությամբ՝ տեսանյութում։
Մարինե Խառատյան
