«Քաղաքացիները պատգամավորներին դեմքով չեն ճանաչում». ԲՀԿ պատգամավորն առաջարկում է մարզերում պարտադիր ԱԺ արտագնա նիստեր անցկացնել

Հնարավոր է, որ յուրաքանչյուր նստաշրջանի ընթացքում Ազգային ժողովը որեւէ մարզում արտագնա նիստ անցկացնի:

Factor.am-ին հայտնի դարձավ, որ «Բարգավաճ Հայաստան» խմբակցության պատգամավոր Սերգեյ Բագրատյանը ցանկանում է Ազգային ժողովի կանոնակարգ-սահմանադրական օրենքում փոփոխություն անել, որով կամրապնդվի այդ դրույթը:

Պատգամավորը, մասնավորապես, առաջարկում է, որ նստաշրջանի ընթացքում ՀՀ մարզերից մեկում պարտադիր արտագնա նիստ անցկացվի, որի ընթացքում կքննարկվեն տվյալ մարզին վերաբերվող խնդիրներ:

Կանոնակարգում այս պահին եւս նշված է մարզերում արտագնա նիստ անցկացնելու մասին, սակայն դա պարտադիր պայման չի համարվում: Միաժամանակ նշենք, որ 7-րդ գումարման խորհրդարանը դեռ որեւէ անգամ մարզերում արտագնա նիստ չի գումարել, նման փորձ առկա չէ նաեւ 6-րդ գումարման խորհրդարանի դեպքում։

Սերգեյ Բագրատյանը Factor.am-ի հետ զրույցում իր կողմից հեղինակած օրենսդրական նախաձեռնության անհրաժեշտությունը հետեւյալ կերպ մեկնաբանեց.

«Սա անհրաժեշտություն է այն պարզ պատճառով, որ նախընտրական քարոզարշավի ընթացքում խոստումներ ենք տալիս, որ ականաջալուր կլինենք խնդիրներին: Սա կլինի Ազգային ժողովի ինստիտուցիոնալ շփումն ընտրողի հետ, ոչ թե անհատական պատգամավորի այցը: Որեւէ վիճակագրություն չկա, թե պատգամավորները քանի անգամ են այցելել մարզ: Մեր ընտրողներն արդարացիորեն բողոքում են, որ պատգամավորներին տեսնում են ընտրությունից ընտրություն»:

Սերգեյ Բագրատյանը նշում է, որ այդ նիստերը գումարվելու են ոչ միայն մարզկենտրոնում, այլ տվյալ մարզի որեւէ քաղաքում:

«Այդ նիստը հերթական չի լինելու, օրակարգում լինելու է տվյալ մարզի երեք-չորս հիմնախնդիրը, որը մեկ ամիս առաջ կքննարկվի համապատասխան հանձնաժողովում: Կազմակերպվելու է քաղաքացիների ընդունելություն, քանի որ քաղաքացիներից շատերը պատգամավորներին չեն ճանաչում: Ճիշտ կլինի, որ քաղաքացին ում ընտրել է՝ հետը շփվելու հնաարվորություն ունենա, բարձրաձայնի իր խնդիրը, որին քվե է տվել»:

Գլխադասային հանձնաժողովի՝ Պետական-իրավական հարցերի մշտական հանձնաժողովի նախագահ Վլադիմիր Վարդանյանի առաջարկությամբ փորձնական ծրագիր է անցկացվելու: Բարգրատյանը նշեց, որ եթե ամեն ինչ ըստ պլանավորածի ընթանա, նախագիծը կդառնա օրենք:

Նարեկ Կիրակոսյան