19.10.2026 | 23:33
Հայտնաբերվել է 431 ոչ սթափ վարորդ․ պարեկների անցած շաբաթվա ծառայության արդյունքները
Ինչու է Հ1-ը պատերազմի տարելիցին համերգ հեռարձակել․ կառույցից գրավոր հարցում են պահանջում
27.09.2026 | 21:13
44-օրյա պատերազմի մեկնարկի տարելիցի օրը համերգ ցուցադրած Հանրային հեռուստաընկերությունը գրավոր հարցում է պահանջում՝ պարզաբանելու, թե ինչու է այսօր եթերացանկում «Համերգ-ֆեստիվառ» ընդգրկել։
Factor.am-ին ընկերության Հանրային կապերի բաժնից փոխանցեցին, որ թեմային բանավոր չեն անդրադառնալու։
Սեպտեմբերի 27-ին, երբ մարդկանց հոսքը չի դադարում «Եռաբլուր» զինվորական պանթեոն՝ հայրենիքի համար զոհված տղաների հիշատակը հարգելու, Հանրայինի գլխավոր՝ «Առաջին ալիքը», որն ունի մեծ լսարան, տոնական տրամադրություն ապահովող համերգ է ցուցադրում։
Ընդհանուր առմամբ, այսօր «Առաջին ալիքի» եթերացանկն ընդհանրապես չի անդրադառնում պատերազմի մեկնարկի տարելիցին։ Օրը Հանրային հեռուստաընկերությունը սկսել է դասական համերգով, այնուհետև ցուցադրել ժամանցային «Առավոտ լուսո» հաղորդումը, մարդկանց ու շենքերի մասին պատմող բովանդակություն, մուլտֆիլմ, արդեն իսկ նշված «Ֆեստիվառ» համերգը և այլ ժամանցային հաղորդումներ։
Իսկ այսօրվա «Մեծ բանավեճը» նվիրված է վարչապետի աշխատակազմի կողմից Կաթողիկոսին ու Եկեղեցուն առնչվող զեկույցի թեմային։ Հանրայինի լրատվական ալիքն էլ ամբողջ օրվա ընթացքում ընդամենը մեկ լուր է հրապարակել այն մասին, որ այսօր 44-օրյա պատերազմի մեկնարկի տարելիցն է։ Որևէ հրապարակում չկա նաև «Եռաբլուր» այցելությունների մասին։
Նշենք, որ Factor.am-ը արդեն գրավոր հարցմամբ դիմել է Հանրային ՀԸ-ին, սպասում ենք պատասխանին։
Նարեկ Կիրակոսյան
