13.08.2026 | 11:39
ԿԳՄՍ նախարարը հետևել է Հայոց ցեղասպանության զոհերի հուշահամալիրի բարեկարգման աշխատանքների ընթացքին
Սերգեյ Բագրատյանի նկատմամբ քրգործի հարուցումը ՀՔԾ-ն մերժել է
Հասարակություն
13.05.2019 | 16:36
Ազգային ժողովի «Բարգավաճ Հայաստան» խմբակցության պատգամավոր Սերգեյ Բագրատյանի նկատմամբ Հատուկ քննչական ծառայությունում քրեական գործ չի հարուցվի։ Այս մասին Factor.am-ի հետ զրույցում ասաց Հատուկ քննչական ծառայության մամուլի խոսնակ Մարինա Օհանջանյանը։
«Քննիչի կողմից որոշում է կայացվել Վայոց ձորի մարզպետի տեղակալի հաղորդման առթիվ նախապատրաստված նյութերով քրեական գործ հարուցելը մերժել։ Քրեական գործի հարուցումը մերժվել է ՀՀ ՔՕ-ի 258-րդ հոդվածով նախատեսված խուլիգանության հանցակազմի բացակայության հիմքով»,- ասաց նա:
Հիշեցնենք, որ Վայոց ձորի մարզպետի տեղակալ Ռազմիկ Տոնոյանը հաղորդում է ներկայացրել Ոստիկանություն, որ ԱԺ «Բարգավաճ Հայաստան» խմբակցության պատգամավոր Սերգեյ Բագրատյանն ու Եղեգիս համայնքի Արտաբույնք բնակավայրի վարչական ղեկավար Արմեն Սեդրակյանը հարձակվել են իր վրա, անհարգալից վերաբերմունք ցուցաբերել, իր հասցեին հնչեցրել սեռական բնույթի հայհոյանքներ, անվայել արտահայտություններ արել:
Այնուհետև հրապարակվել էին լուսանկարներ՝ Եղեգնաձորում ԱԺ ԲՀԿ խմբակցության պատգամավոր Սերգեյ Բագրատյանի և Վայոց Ձորի Եղեգիս համայնքի Արտաբույնք համայնքի ղեկավար Արմեն Սեդրակյանի մասնակցությամբ տեղի ունեցած միջադեպից:
