09.06.2026 | 22:34
Եղիշե Մելիքյանը` Մոլդովայի հետ ոչ-ոքիի մասին․ ՏԵՍԱՆՅՈՒԹ
Մարտի 1-ին օլիգարխների կողմից գումարներ բաժանելու մասին տեղեկություն չունեմ. Սեյրան Օհանյան
Հասարակություն
02.05.2019 | 18:57
Factor.am-ի հետ զրույցում երեկ փաստահավաք խմբի անդամ Սեդա Սաֆարյանն ասել էր, որ Մարտի 1-ի դեպքերի ժամանակ օլիգարխները զինվորներին 50 հազարական դրամներ են բաժանել:
Մարտի 1-ի գործով Սահմանադրական կարգի տապալման համար մեղադրվող ՀՀ պաշտպանության նախկին նախարար Սեյրան Օհանյանը, որը 2008 թվականին ՊՆ Զինված ուժերի գլխավոր շտաբի պետի պաշտոնն էր զբաղեցնում, Factor.am-ի հետ զրույցում ասաց, որ տեղյակ չէ, թե ինչ փողերի բաժանման մասին է խոսքը:
«Ես տեղեկություն չունեմ, եթե անգամ այդպիսի տեղեկություն կա, դա նախաքննական գաղտնիք է»,- ասաց նա՝ հավելելով․ «Որ զինվորներին վարձկաններ են սարքել, օլիգարխները գումարներ են բաժանել, ես այդ մասին տեղեկություն չունեմ»:
Հիշեցնենք, որ սեպտեմբերի 11-ին հրապարակված հայտնի գաղտնալսման առիթով հրավիրված մամլո ասուլիսում այս մասին խոսել էր նաև ՀՔԾ պետՍասուն Խաչատրյանը, նա, մասնավորապես, ասել էր. «Ամենախայտառակ բանը, որ արել են բանակի հետ, նախկին պաշտոնյաների կողմից մեր զինվորներին վարձկաններ սարքելն է, որը քրեական գործով հիմնավորվել է»:
ՀՔԾ պետը նաև ընդգծել էր. «Օլիգարխների կողմից, այդ ընթացքում՝ փետրվարի 23-ից մարտի 7-8-ը, բանկի զինվորներին բաժանվել են գումարներ նրա համար, որ նրանք պաշտպանեն իրենց, իրենց ունեցվածքը: Մատյանը առգրավվել է ՀՔԾ-ի քննիչի կողմից, որտեղ հատ-հատ նշված են այն զինծառայողները, և գումարների չափերը, որոնք տրվել են այդ զինծառայողներին, դրանց դիմաց առկա են այդ զինծառայողների, նրանց հրամանատարների ստորագրությունները: Այդ գումարները հանվել են օլիգարխների, պետական բարձր պաշտոնյաների հաշիվներից, որոնք կհրապարակենք հետագայում: Ես չգիտեմ՝ ոնց են սրա բացատրությունը տալու մեր երկրի նախկին ղեկավարները, ինչպես են բանակի զինվորներին դարձրել վարձկաններ և հանել ժողովրդի դեմ»:
Լիլիթ Շաբոյան
