12.01.2026 | 01:05
«Բարսելոնան» հաղթեց «Ռեալին» ու դարձավ Իսպանիայի սուպերգավաթակիր․ ՏԵՍԱՆՅՈՒԹ
Օլիգարխները 50 հազարական դրամ են բաժանել զինվորականներին. Սեդա Սաֆարյանի բացահայտումը Մարտի 1-ի գործից. ՏԵՍԱՆՅՈՒԹ
Քաղաքականություն
01.05.2019 | 20:30
Երկու օր առաջ Գլխավոր դատախազությունը հաստատել է Մարտի 1-ի գործից անջատված մասը և ուղարկել Երևան քաղաքի ընդհանուր իրավասության դատարան: Հիշեցնենք՝ այդ գործով մեղադրվում էին ՀՀ երկրորդ նախագահ Ռոբերտ Քոչարյանը, նրա աշխատակազմի ղեկավար Արմեն Գևորգյանը, ԶՈւ գլխավոր շտաբի պետ Սեյրան Օհանյանը, ինչպես նաև պաշտպանության նախկին փոխնախարար Յուրի Խաչատուրովը: Գործի մասին Factor.am-ը զրուցել է փաստաբան Սեդա Սաֆարյանի հետ:
– Տիկի՛ն Սաֆարյան, Դուք մարտի 1-ի իրադարձությունների ժամանակ ծնոտի հատվածում վիրավորում ստացած Արթուր Ավագյանի պաշտպանն եք: Հասցրե՞լ եք ծանոթանալ այդ գործին ամբողջությամբ:
– Անկեղծ ասած՝ ամբողջությամբ չեմ հասցրել ծանոթանալ, սակայն առաջադրված մեղադրանքի շուրջ ապացույցները բավարար եմ համարում։ Չորս անձի մասով գործը, կարծում եմ, դատարան է ուղարկվել բավարար ապացույցների համակցության պայմաններում։ Եվ չեմ կիսում պաշտպանության կողմի տեսակետը, որ այդ չորս անձինք քաղբանտարկյալներ են, քաղաքական հետապնդումների են ենթարկվում:
– Այդ գործում նոր բան բացահայտեցի՞ք Ձեզ համար: Ձեր գործընկերներից Վահե Գրիգորյանը գործին նախնական ծանոթության շրջանում ասել էր, որ հանգամանքներն ու նկարագրվող իրադարձությունները ավելի քան շոկային են:
– Ես շոկային վիճակը վաղուց հաղթահարել եմ՝ 2008-2009 թվականներին՝ և՛ ականատես լինելով, և՛ առնչվելով մի շարք բարձրաստիճան պաշտոնյաների հետ, ովքեր պատմել են մարտիմեկյան իրադարձությունների մասին: Իհարկե՝ հնարավոր չէ, որ քննությունը խորացված չլիներ, որովհետև այնպես չէ, որ Փաստահավաք խումբը հասցրել էր ամփոփել ամեն ինչ: Բավականին նոր հանգամանքներ կան: Օրինակ՝ մենք, ըստ էության, տեղեկացված չենք եղել, որ գումարներ են բաժանվել մասնակիցներին, ովքեր զորամասերից եկել, տեղակայվել են Երևանում: Կանոնակարգված է եղել այդ հարցը, և յուրաքանչյուրը 50 հազարական դրամ է ստացել: Այդ գումարների վճարման աղբյուրներն էլ են տարբեր եղել. խոսքը և՛ օլիգարխների կողմից, և՛ պետական միջոցներից վճարելու մասին է:
– Ո՞ր օլիգարխների կողմից են տրվել այդ գումարները: Հայտնի՞ անուններ են:
– Այո՛, հայտնի անուններ են, բայց առայժմ եկեք այդ մասով չխոսեմ: Այս հանգամանքը, ըստ էության, տեղ չի գտել նախկին քրեական գործերում, երբևէ չեմ լսել այսպիսի տեղեկատվության մասին։ Եվ լավ է, որ Հատուկ քննչական ծառայությանը հաջողվել է ունենալ այդ ցուցակները:
– Դրանք կարո՞ղ են այն նույն աննունները լինել, որոնց ծանոթ ենք այլ ցուցակից՝ ՊՆ պահեստներից զինվորական հագուստ ստացած մարդի՞կ էին։
– Այո՛, գրեթե նույն անձինք են, այդ ցուցակների միջև մեծ տարբերություն չկա։
– Գագիկ Ծառուկյա՞ն, Հովիկ Աբրահամյա՞ն…
– Կհրապարակենք այդ անունները։
– Շոկայի՞ն է լինելու այդ ցանկի հրապարակումը։
– Ես կարծում եմ, որ դատաքննության ընթացքում այն, ինչ հնչեցվելու է, և ընդհանրապես գործի ապացույցների հետազոտումը, հրապարակումը իրականում շատ լուրջ փուլ կլինի։ Մենք նաև անհատական կարծիքներ կդրսևորենք հրապարակված ցանկացած ապացույցի մասին։ Ես նաև մտածում եմ, որ խորացված է քննությունը Կառավարության շենքում տեղակայված զորամիավորումների դեպքում։ Ես շատ զարմացա, երբ կարդացի, որ Սերժ Սարգսյանի կողքի սենյակում տեղակայված է եղել Յուրի Խաչատուրովը։ Եվ այս բոլորը հաստատում են այն պնդումները, որ դա կազմակերպված է եղել պետական մակարդակով: Ու խոսել այն մասին, որ հանրապետության նախագահը տեղյակ չի եղել, ընդունելի չէ։
– Փող բաժանած օլիգարխները ցուցմունք տվե՞լ են:
– Ես դեռ ամբողջությամբ չեմ հասցրել ծանոթանալ այդ գործին և չեմ կարող ասել՝ տվե՞լ են, թե՞ ոչ։ Կաշխատեմ առաջիկա 10 օրերին ավարտել այդ փուլը։ Չեմ բացառում, որ հետագա հատորներում հանդիպեմ նաև նրանց ցուցմունքներին։
– Ձեր տպավորությամբ՝ դատավարությունն ի՞նչ ընթացք կարող է ունենալ:
– Երբ տեսնում եմ, թե պաշտպանական թևն ինչ պատճառաբանություններ է ներկայացնում, կարծում եմ՝ դժվար կլինի։ Կարծում եմ՝ ոչ թե կլինի բովանդակային հարցերի քննարկում, այլ շատ ձևական ու երկրորդական հանգամանքներ վեր կհանվեն։ Եվ չեմ բացառում, որ դա ծանրացնի դատարանի աշխատանքը, ձգձգումներ լինեն:
Հարցազրույցն ամբողջությամբ՝ տեսանյութում:
Արմինե Ավետյան
