02.11.2024 | 14:03
ՀՀ ոստիկանությունը քաղաքական պատվեր է կատարում․ Հ․ Ավետիսյանը դիմեց Ոստիկանությանը և ԱՄՆ դեսպանին․ ՏԵՍԱՆՅՈՒԹ
Վանաձորի թիվ 4 դպրոցի տնօրենը թույլ չտվեց լրագրողներին մասնակցել մանկխորհրդի նիստին, նաև հրահանգեց ուսուցիչներին՝ չխոսել․ ՏԵՍԱՆՅՈՒԹ
Հասարակություն
19.04.2019 | 18:57
Factor.am-ն օրերս անդրադարձել էր Վանաձորի թիվ 4 դպրոցում ստեղծված իրավիճակին՝ ներկայացնելով ուսուցչուհի Կարինա Հարությունովայի բողոքն առ այն, որ դպրոցի տնօրենն իր հանդեպ խտրական վերաբերմունք է ցուցաբերում: Վերջինս նաև տնօրենի նկատմամբ դատական հայց է ներկայացրել:
Այսօր դպրոցում հրավիրվել էր մանկավարժական խորհրդի նիստ: Հարությունովան պնդում էր, թե նիստում քննարկվելու է իր հարցը, նշելով, որ մինչ այս դպրոցի ուսուցիչներն ընդդեմ իրեն ստորագրահավաք են կազմակերպել: Ուսուցչուհին այս հարցով տնօրենին նաև դիմում է գրել, որտեղ մասնավորապես նշել է. «Խնդրում Ձեզ, տրամադրել թիվ 4 հիմնական դպրոցի անձնակազմի՝ իմ դեմ ստորագրահավաքի պատճենը»:
Մինչդեռ տնօրեն Համլետ Խումարյանը լրագրողների հետ զրույցում բացառեց ստորագրահավաքի կազմակերպումը. «Նման բան չի կազմակերպվել, ուսուցիչներն ինձ գրավոր դիմումով դիմել են ուսումնական գործընթացին վերաբերվող հարց քննարկելու համար, ոչ թե ստորագրահավաք է եղել»:
Տնօրենը նաև հավաստիացրեց, թե լրագրողներն իրավունք չունեն ներկա գտնվելու մանկավարժական խորհրդի նիստին: Այնուհետև նիստի անդամներն, առանց լրագրողների ներկայության, կատարեցին քվեաՐկություն՝ 3 դեմ, 3 ձեռնպահ, 43 կողմ հարաբերակցությամբ որոշեցին լրատմամիջոցներին թույլ չտալ մասնակցել նիստին:
«Նիստը բաց է միայն մանկավարժական աշխատողների համար, որոնք ընդգրկված չեն մանկավարժական խորհրդի կազմում: Մեր կանոնադրական իրավունքն է ձեզ չթույլատրել մասնակցել նիստին: Նիստից 3 օր անց հրապարակային մեր կայքէջում տեղադրվում է մանկավարժական խորհրդի նիստերի արձանագրությունը, կխնդրեմ տեղեկանաք այդ էջում»,- ասաց Խումարյանը:
Երբ փորձեցինք խոսել նիստին ներկա ուսուցիչների հետ, տնօրենը միջամտեց՝ ուսուցիչներին թույլ չտալով խոսել, իսկ լրագրողներին սենյակից դուրս հրավիրեց: Մանկավարժական խորհրդի նիստին մասնակցում էին նաև ներկայացուցիչներ Լոռու մարզպետարանի կրթության, մշակույթի և սպորտի վարչությունից:
Առաջիկայում Factor.am-ը կներկայացնի, թե նիստում ինչ հարց է քննարկվել:
Տաթևիկ Ղազարյան
