Արթուր Սաքունցի կինը դատի է տվել դպրոցի տնօրենին. ՏԵՍԱՆՅՈՒԹ

Վանաձորի Պուշկինի անվան թիվ 4 դպրոցի ռուսերենի ուսուցչուհի Կարինա Հարությունովան ասում է, թե դպրոցի տնօրենն իր նկատմամբ խտրական վերաբերմունք է ցուցաբերում: Նրա խոսքով՝ նման վերաբերմունքի է արժանացել այն պատճառով, որ ինքն իրավապաշտպան Արթուր Սաքունցի կինն է:

-Շատ դեպքերում արտահայտությունը հենց այդպես էլ հնչում էր, որ Արթուր Սաքունցի կինն է, ինքը խնդրհարույց է: Չգիտեմ որտեղից էր վերցվել, ինչի՞ց էին դա ենթադրել, բայց նման արտահայտություններ կոնկրետ տնօրենի կողմից շատ են եղել,- ասում է Հարությունովան և վստահեցնում, որ իր նկատմամբ տնօրենի կողմից տարբերակված մոտեցում եղել է միշտ, ավելի ակնառու է դարձել հատկապես վերջին շրջանում:

Մոտ մեկ ամիս առաջ էլ Dasaran.am էլեկտրոնային մատյանում աշակերտների գնահատականները չմուտքագրելու համար ենթարկվել է կարգապահական տույժի. «Երբ որ քննարկեցինք Dasaran.am էլեկտրոնային մատյան գնահատականները ե՞րբ և ինչպե՞ս են անցկացվել, ստացվեց, որ այդ խախտումը մենակ ես չեմ արել: Խախտումներ եղել են նաև իմ կոլեգաների կողմից: Բայց նկատողությունը ստացել եմ մենակ ես»:

Դպրոցի տնօրեն Համլետ Խումարյանը, սակայն, հակադարձում է՝ պնդելով, որ ինքը Հարությունովայի նկատմամբ խտրական վերաբերմունք չի ցուցաբերում: Նա հավաստիացնում է, որ ուշադիր է բոլոր ուսուցիչների վարքագծի նկատմամբ. «Խտրականության դրսևորման որևէ տարր չկա: Իմ բոլոր գործողությունները համաչափ են և ըստ օրենքի: Իմ կողմից աչալուրջ ձևով վերահսկվում է բոլորի աշխատանքային պարտականությունները, թերացող ուսուցիչները զգուշացվում են: Ես դրա մեջ որևէ վատ բան չեմ տեսնում, երբ տնօրենը փորձում է աշխատանքային կարգապահությունը պահել բարձր մակարդակի վրա»:

Մոտ 11 տարվա աշխատանքային փորձով ուսւոցչուհին որոշել է խնդրին լուծում տալ դատական կարգով: Հարությունովան Խումարյանի նկատմամբ դատական հայց է ներկայացրել. «Խտրական վերաբերմունքը միանգամյա գործողություն չէ, որ ես միանգամից դրա համար տվել եմ դատարան: Դա տարիների ընթացքում կատարված քայլեր են, որոնք ես ընկալեցի որպես խտրական վերաբերմունք: Երկրորդ անգամ եմ մտել դատարան, առաջինը՝ խոսքը գնում է էթիկայի նորմերի խախտման մասին: Գործը վարույթ է ընդունվել, բայց դեռ դատը չի եղել»:

Դպրոցի տնօրենն էլ շեշտում է, որ ուսուցչուհին այդ քայլին է գնում անձնական նկատառումներից ելնելով և հավելում, որ գուցե ինքն էլ հանդես գա հակընդդեմ հայցով. «Եթե այն փաստարկները, որոնք նախկինում եղել են հայցադիմումի մեջ, մնան նույն ձևով՝ կդիտարկեմ որպես բարի համբավի արատավորում, և զրպարտության համար հակընդդեմ հայց կներկայացնեմ դատարան»:

Մանրամասները՝ տեսանյութում:

Տաթևիկ Ղազարյան