«Մարտի 1-ի» հետ կապված դեպքերը պատմության դասագրքերում կողմնակալ են ներկայացված․ Սերոբ Խաչատրյան․ ՏԵՍԱՆՅՈՒԹ

Կրթության փորձագետ Սերոբ Խաչատրյանի խոսքով՝  «Մարտի 1»-ի դեպքերը պատմության դասագրքերում կողմնակալ են ներկայացված, ինչը կապված է քաղաքական իրադրության հետ։ Այս մասին այսօր հրավիրված քննարկման ժամանակ, անդրադառնալով հարցին՝ ինչպես են «Մարտի 1-ի» դեպքերը ներկայացված դպրոցական դասագրքերում, ասաց Սերոբ Խաչատրյանը։

«Պատմության դասագրքեր գրելիս հնարավորինս պետք է փաստական և չեզոք գրվեն, նույնը վերաբերում է նաև մեր օրերի պատմությանը, ինչը գրելը շատ դժվար է, որովհետև  այն մարդիկ, որոնց մասին գրում են, կենդանի են և նրանցից յուրաքանչյուրը մասնակից է եղել այս կամ այն իրադարձություններին, կամ եղել է խրամատի տարբեր կողմերում։ Կարծում եմ, որ հիմա Հայաստանում ունենք այնպիսի հնարավորություն, որ այլևս չունենանք քաղաքական կոնյուկտուրայով պայմանավորված տեսակետներ, իսկ պատմաբաններն էլ չեն վախենա, որ եթե իրենք մի փոքր ավելի օբյեկտիվ գրեն, իրենցից կարող են դժգոհել»,- ասաց  Սերոբ Խաչատրյանը։

Քննարկման մասնակից «Կրթական քաղաքացիական նախաձեռնության» անդամ  Լուսինե Խառատյանն էլ խնդրի վերաբերյալ նկատեց, որ կան խնդիրներ ոչ միայն «Մարտի 1-ի» դեպքերի նկարագրման հետ կապված, այլ առհասարակ։

«Պատմության դասագրքերը գրվում են շատ հին էսենցիալիստական մոտեցումներով այն դեպքում, երբ պատմություն դասավանդելը չպետք է այդ դիրքից արվի։ Պետք է  պատմության այս կամ այն դրվագը մեկ տեսանկյունից չներկայացնել՝ երեխաներին տալով  դրանց տարբեր տեսանկյուններից նայելու  հնարավորություն։ Երեխաներն այդկերպ մասնակից կդառնան քննարկման և դրա միջոցով կյուրացնեն նյութը։ Պատմության առարկան այն կարևոր առարկաներից մեկն է, որը պետք է ավելի գլոբալ վերանայել»,- ասաց նա։

Քննարկման մասնակից ՀՀ կրթության և գիտության նախարարի տեղակալ Արևիկ Անափիոսյանն էլ դասագրքերում զետեղվող նյութերի բովանդակության հետ կապված կարևորեց  դրանք ակադեմիական մեթոդաբանությամբ և գիտական մեթոդի կիրառմամբ ներկայացնելու անհրաժեշտությունը։

«Եթե մենք ունենանք պատմությունը պատմելու և ուսումնասիրելու ակադեմիական մեթոդաբանություն, ապա այդ դեպքում քաղաքական ենթատեքստերը կկարողանանք մարգինալացնել»,- ասաց նա։

Մանրամասները՝ տեսանյութում։