25.07.2026 | 18:58
Հնդկաստանի կրթության նախարարը հրաժարական է տվել բազմահազարանոց ուսանողական բողոքի ցույցերից հետո
Ջրային համակարգում 10,5 միլիարդ դրամի պարտք կա, գործել են լուրջ կոռուպցիոն սխեմաներ. Նիկոլ Փաշինյան. ՏԵՍԱՆՅՈՒԹ
Հասարակություն
15.02.2019 | 13:24
Կառավարությունը սոցիալական աջակցություն կտրամադրի սահմանամերձ 16 համայնքների 38 բնակավայրի ընտանիքներին: Հարցը զեկուցող ՀՀ տարածքային կառավարման և զարգացման նախարար Սուրեն Պապիկյանը նշեց, որ նախագծով առաջարկվում է 2019 թ. պետբյուջեով սահմանամերձ համայնքների սոցիալական աջակցության ուղղությամբ հատկացված 928.8 մլն դրամի գումարի վերաբաշխում կատարել:
«Ծրագրի շրջանակում փոխհատուցվում են բնական գազի, էլեկտրաէներգիայի և ոռոգման ջրի սակագների 50 տոկոսը, ինչպես նաև գույքահարկն ու հողի հարկը՝ ամբողջությամբ»,- նշեց նա:
Վարչապետը հետաքրքրվեց նաև, թե ինչպես են ընթանում ոռոգման սեզոնի նախապատրաստական աշխատանքները: Սուրեն Պապիկյանը տեղեկացրեց, որ Կառավարության կողմից գումարի տրամադրումից հետո աշխատանքներն արդեն մեկնարկել են. «Ամեն ինչ անում ենք, որ Ձեր նախանշած ժամկետում բոլոր տնտեսությունները ջուր ունենան: Կարծում եմ՝ կհասցնենք»:
Նիկոլ Փաշինյանն առաջարկեց համայնքների բնակիչներին նույնպես ներգրավել այդ գործընթացում, քանի որ, նրա պնդմամբ, շատ դեպքերում հարկ է լինում լուծել հենց քաղաքացիների կողմից առաջացրած խնդիրները: «Օրինակ՝ ջրանցքներն օգտագործում են որպես աղբանոցներ: Հիմա պետբյուջեից միջոցներ ենք տրամադրում, որ ջրանցքների այդ աղբը մաքրվի»,- ասաց վարչապետը:
Ջրային համակարգում մեկ այլ խնդիր էլ կա՝ 8-ից 10.5 միլիարդ դրամի կուտակված պարտք: «Խնդիրն ինչում է. մենք այսպիսի մեխանիզմներ ունենք, երբ ջուրը մատակարարվել է, ջրի դիմաց պարտք է գոյացել: Պետք է հասկանանք՝ այդ պարտքը ինչպես է գոյացել։ Գյուղացիները չե՞ն վճարել, գյուղացիները վճարել են, ընկերությունները չե՞ն հաշվառել»,- նշեց Նիկոլ Փաշինյանը։
Վարչապետը հավելեց, որ հարկավոր է հասկանալ, թե ինչպես է գոյացել պարտքը. «Ինչքան քննարկում ենք, քիչ հավանական է, որ գյուղացին չի վճարել: Մենք ունենք վարկած, որ լուրջ կոռուպցիոն սխեմաներ են գործել»:
Պետական վերահսկողական ծառայությունն արդեն ուսումնասիրում է խնդիրը: Ծառայության ղեկավար Դավիթ Սանասարյանն ասաց՝ վարչապետի հանձնարարականի ժամկետը լրանում է մարտի 15-ին, այդ ժամանակ էլ կներկայացնեն ուսումնասիրության արդյունքները: Սակայն որոշ եզրահանգումներ արդեն իսկ արել են:
«Այդ պարտքի մեծ մասը ձևավորվել է այսպես. գյուղացին վճարում է իր օգտագործած ջրի դիմաց, բայց դա տեղ չի հասնում, հետո վերջում գրում են կորուստներ և այլն, և այլն: Հիմնական ձեռագիրը սա է: Վերջում ավելի մանրամասն կներկայացնենք»,- ասաց Դավիթ Սանասարյանը:
Մանրամասները՝ տեսանյութում:
