05.11.2024 | 19:30
Որոշ բուհեր կարող են փակվել․ օրենքի նոր նախագիծը մտահոգել է մասնագետներին․ ՏԵՍԱՆՅՈՒԹ
Աջ ղեկով մեքենաների ներմուծման թույլտվությունը հետաձգվեց. պայմանավորվածություն է խախտվել. ՏԵՍԱՆՅՈՒԹ
Տնտեսություն
15.02.2019 | 12:45
Կառավարության նիստի ընթացքում այսօր քննարկվեց աջակողմյան ղեկային տեղաբաշխման տրանսպորտային միջոցների ներմուծումն արգելելու մասին ՀՀ օրենքում փոփոխություններ կատարելու օրենքի նախագիծը։
Այն ներկայացրեց ՀՀ տրանսպորտի, կապի և տեղեկատվական տեխնոլոգիաների նախարար Հակոբ Արշակյանը։
Ըստ նախագծի՝ հնարավորություն կընձեռվի մինչև 2019 թվականի ապրիլի 1-ը Հայաստան ներմուծել ՀՀ մաքսային տարածքներում տեղակայված աջակողմյան ղեկային տեղաբաշխմամբ այն տրանսպորտային միջոցները, որոնց ձեռքբերման վճարումները կատարվել են մինչև 2018 թվականի դեկտեմբերի 30-ը։ Օրենքի նախագծի ընդունմամբ՝ կթույլատրվի նաև վերոնշյալ տրանսպորտային միջոցների հաշվառումը և շահագործումը՝ առանց ղեկային տեղաբաշխման փոփոխության։ Ըստ Հակոբ Արշակյանի՝ խոսքը 830 մեքենայի մասին է։
Վարչապետ Նիկոլ Փաշինյանը, արձագանքելով նախարարի առաջարկին, նշեց․ «Այն ժամանակ ինձ ասում էին, որ կարող են մեքենաները ներկայացնել իրենց VIN կոդերով։ Այսպիսի լղոզված ձևակերպումներ տալով՝ մենք ոչ թե հարցը լուծում ենք, այլ ընդհակառակը։ Մենք պայմանավորվածություն ենք ունեցել, որ VIN կոդով ներկայացված 400 կամ ավել մեքենաները ներմուծելու ենք և այս թեմային այլևս երբեք չեն անդրադառնալու։ Հիմա կարող է պարզվել, որ 10․000 գնված մեքենա կա։ Խոսքը պետք է վերաբերի միայն այն մեքենաներին, որոնք արդեն գտնվում են մաքսային գոտում»։
Փաշինյանն ընդգծեց, որ օրենքի նման նախագիծ ընդունելու դեպքում հնարավոր է, որ աջակողմյան մեքենաների քանակն ինչ-որ պահի գերազանցի ձախակողմյան մեքենաներին, ինչը երթևեկության կանոնների ամբողջ համակարգը փոփոխելու անհրաժեշտություն կառաջացնի՝ հսկայական վնաս հասցնելով երկրի բյուջեին։
Հարցը հանվեց վերամշակման համար և նախարարը խոստացավ վերանայել օրենքի նախագիծը։
Նելլի Մելքոնյան
