03.04.2026 | 00:12
Վարդան Ղուկասյանի որդու խափանման միջոցը փոխվել է. նա տնային կալանքի տակ է
«Սասնա ծռերի» անդամը 17 օր է հացադուլի մեջ է. փաստաբանը պնդում է՝ իր պաշտպանյալը «հյուծված վիճակում է»
Քաղաքականություն
07.08.2017 | 17:24
«Սասնա ծռեր» խմբի անդամ Վարդան Գերավետյանն արդեն 17 օր է՝ հացադուլի մեջ է, և այն դադարեցնելու մտադրություն չունի: Այս մասին Factor.am-ին փոխանցեց նրա պաշտպան Դավիթ Գյուրջյանը:
Երկու օր առաջ Վարդան Գերավետյանին տեսակցած փաստաբանը նշեց, որ իր պաշտպանյալն «արդեն բավական հյուծված վիճակում է, նիհարել է»:
«Ինքն ընդհանուր առմամբ առողջական վիճակի հետ կապված խնդիրներ ունի, և կոնկրետ դրա հետ կապված հացադուլի ընթացքում որևէ ստուգում չի իրականացվել»,- մեզ հետ զրույցում ասաց փաստաբանը:
Պաշտպանի փոխանցմամբ՝ միայն Վարդան Գերավետյանի բարձրաձայնելուց հետո են սկսել նրա կշռել, մինչդեռ, ըստ փաստաբանի, դա պետք է անեին հացադուլի առաջին օրվանից, որպեսզի հետևեին քաշի անկման դինամիկային:
Դավիթ Գյուրջյանը հիշեցրեց՝ իր պաշտպանյալը հացադուլ հայտարարելով նախ պահանջում է «Սասնա ծռեր» խմբի անդամներին՝ Գևորգ Սաֆարյանին, Անդրիաս Ղուկասյանին, Շանթ Հարությունյանին ճանաչել քաղբանտարկյալ, ապա «Նուբարաշեն» ՔԿՀ-ում գտնվող «Սասնա ծռեր» խմբի անդամների խցերը փոխել և նրանց տեղափոխել առանձնացված խցեր։ Բացի այդ, Հաց բերող անունը ստացած Արթուր Սարգսյանի գործով քննություն իրականացնել՝ դատավորների և քննիչների որոշումների և անգործության դեմ:
Նշենք, որ հաջակցություն Վարդան Գերավետյանի՝ հացադուլ է հայտարարել նաև «Սասանա ծռեր» խմբի մեկ այլ անդամ Տիգրան Մանուկյանը:
Փաստաբան Դավիթ Գյուրջյանից տեղեկացանք՝ իր պաշտպանյալի ներկայացրած պահանջներից որևէ մեկի առնչությամբ մինչ այժմ արձագանք չի եղել:
Շողիկ Գալստյան
