Պուտինը Հայաստանի և Ռուսաստանի միջև ապրանքաշրջանառության ծավալների աճը պահպանելու հույս է հայտնել

Ռուսաստանի և Հայաստանի միջև ապրանքաշրջանառության ծավալներն աճում են, հարկավոր է պահպանել այս դինամիկան: ՀՀ վարչապետի պաշտոնակատար Նիկոլ Փաշինյանի հետ դեկտեմբերի 27-ին Մոսկվայում հանդիպման ժամանակ այս մասին հայտարարել է ՌԴ նախագահ Վլադիմիր Պուտինը, գրում է ՏԱՍՍ-ը:

«Մեր հարաբերությունները բնութագրելու կարիք չկա. դրանք իսկապես դաշնակցային հարաբերություններ են՝ բավական մեծ բովանդակությամբ»,- ասել է Պուտինը: Նա, մասնավորապես, նշել է, որ Ռուսաստանը օտարերկրյա պետությունների հետ Հայաստանի արտրաքին տնտեսական համագործակցության առումով շարունակում է պահպանել առաջին տեղը՝ հավելելով, որ 2017 թվականին երկկողմ ապրանքաշրջանառությունն աճել է գրեթե 30%-ով:

«Այս տարվա տասը ամիսներին այս ցուցանիշին ավելացել է ևս 17.5%: Դինամիկան լավն է, հարկավոր է պահպանել այն»,- ասել է ՌԴ նախագահը:

Պուտինի խոսքով՝ Մոսկվան պատրաստ է իրենից կախված ամեն ինչ անել՝ Երևանի հետ հարաբերությունները նույն մակարդակի վրա պահելու համար, ընդ որում՝ ոչ միայն տնտեսական, այլև մյուս, մասնավորապես՝ անվտանգության ոլորտում, ՀԱՊԿ-ի և ինտեգրացիոն այլ միավորումների գծով:

Նշելով, որ խորհրդարանական ընտրություններում Նիկոլ Փաշինյանի ղեկավարած ուժի համոզիչ հաղթանակից հետո սա նրա առաջին այցն է Ռուսաստան՝ Վլադիմիր Պուտինը հաջողություններ է մաղթել Փաշինյանին. «Ցանկանում եմ Ձեզ հաջողություն մաղթել բոլոր ծրագրերի իրականացման գործում, որոնք դրել եք Ձեր, Ձեր թիմի առջև՝ ի շահ Հայաստանի և հայ ժողովրդի»: