16.11.2024 | 17:58
Զելենսկին մտադիր է Ուկրաինայի շուրջ հարցերը քննարկել անձամբ Դոնալդ Թրամփի, այլ ոչ թե վերջինիս թիմի հետ
Երևանում արգելված արծաթափայլ եղևնիներ են վաճառվում՝ 45 հազար դրամով. տեսչությունից պարզաբանում են, թե ինչպես են դրանք հայտնվել փողոցներում
Հասարակություն
26.12.2018 | 13:31
Երևանի փողոցներում վաճառվում են արծաթափայլ եղևնիներ, որոնց հատումն ու վաճառքն արգելված է։ Մասնավորապես, Factor.am-ը արծաթափայլ եղևնիների վաճառակետեր է նկատել Երևանի Աբովյան փողոցում՝ «ՍԱՍ» սուպերմարկետի հարևանությամբ: Վաճառականները Factor.am-ի հետ զրույցում տեղեկացրել են, որ եղևնիները Հայաստանի անտառներից են բերված:
Ի դեպ, արծաթափայլ եղևնիները վաճառվում են բավականին բարձր գներով: Երկու մետր հասակ ունեցող մեկ եղևնին վաճառվում է 45 հազար դրամով, իսկ յուրաքանչյուր մեկ ճյուղը՝ 4-5 հազար դրամով: Բնապահպանության և ընդերքի տեսչական մարմնի մասնագետները, ուսումնասիրելով Factor.am-ի կատարած լուսանկարները, ևս փաստեցին, որ վաճառքի իսկապես հանված են արծաթափայլ եղևնիներ: Սակայն Բնապահպանության և ընդերքի տեսչական մարմնի լրատվական ծառայությունից մեզ փոխանցեցին, թե միանշանակ չեն կարող պնդել, որ վաճառվող եղևնիները բերվել են Հայաստանի անտառներից:
«Այդ եղևնիները չեն կարող «Հայանտառի» տարածքից լինել, որովհետև մեր ենթակայության տակ գտնվող անտառտնտեսություններում չեն աճում»,- ասաց լրատվության պատասխանատու Լուսինե Հակոբյանը:
Մեր դիտարկմանը, որ վաճառողները պնդում են, թե եղևնիները հայկական են, Բնապահպանության և ընդերքի տեսչական մարմնի լրատվական ծառայությունից փոխանցեցին. «Հնարավոր է, որ այն ինչ-որ մասնավոր կառույց է աճեցրել և, տեղական ասելով, հենց դա են նկատի ունեցել»:
Բնապահպանության և ընդերքի տեսչական մարմնից փոխանցեցին, որ իրենց աշխատակիցները շրջայցեր են իրականացրել ամանորյա եղևնիների վաճառակետերում։ «Շրջայցերի ընթացքում պարզվել է, որ Երևանի՝ Տիգրան Պետրոսյան փողոցում, Սայաթ-Նովա և Աբովյան փողոցների խաչմերուկին հարող տարածքում, Արաբկիր վարչական շրջանում, Երևան-Աբովյան ավտոճանապարհին, Աբովյան քաղաքի Հատիսի փողոցում, Գյումրի քաղաքում գործող վաճառակետերում վաճառվում են Ռուսաստանի Դաշնությունից ներմուծված սովորական սոճիներ, որոնց վերաբերյալ ներկայացվել են ներմուծման փաստաթղթերը»։
Բնապահպանության և ընդերքի տեսչական մարմնից նշեցին, որ «Յունիվեբ» ընկերության կողմից ներմուծվել է 1000 հատ սովորական սոճի, «Մեդվեդ» ՍՊԸ-ի կողմից՝ 400 հատ, Թումանյան Ա. Ռ.-ի կողմից՝ 560 հատ, Արշակյան Վ.-ի կողմից՝ 1000 հատ, Վարդանյան Մ.-ի կողմից՝ 500 հատ:
«Բոլոր դեպքերում առկա են եղել Ռուսաստանի Դաշնության կողմից տրամադրված Ֆիտոսանիտարական հավաստագրեր։ Շրջայցերի ընթացքում տեղական ծառատեսակներ վաճառակետերում չեն հայտնաբերվել։ Բնապահպանության և ընդերքի տեսչական մարմնի կողմից իրականացվող շրջայցերը կկրեն շարունակական բնույթ»,- եզրափակեցին կառույցից։
