Նոր «Էլեկտրիկ Երևանի» հիմք չկա՛. Էներգետիկայի փոխնախարարը պնդում է, որ ՀԷՑ 160 մլն դոլարի վարկային նոր ծրագիրը «2 տարի լայնորեն քննարկվել է»

 ՀՀ էներգետիկ ենթակառուցվածքների և բնական պաշարների փոխնախարար Հայկ Հարությունյանը factor.am-ի հետ զրույցում «ոչ կոռեկտ» է համարում պահանջը, որ Հայաստանի էլեկտրական ցանցերի 70 տոկոս բաժնետոմսերի գրավադրման թույլտվության որոշման մեջ կառավարությունը մանրամասն տեղեկություն ներկայացներ, թե ինչու և ինչ նպատակով է ՀԷՑ-ը վերցնում այդ 160 մլն դոլարի նոր վարկը:

«ՀԷՑ-ի ներդրումային ծրագիրը և վարկերի ներգրավումը եղել է դեռ 2 տարի առաջ, լայնորեն քննարկվել է», – Factor.am-ի հետ զրույցում ասաց փոխնախարարը՝ շարունակելով. «Ոչ մի գաղտնի և մութ գործարք չկա: Ծավալվել և խոսել մի բանի մասին, որը այլ տեղերում հրապարակվել է և 2 տարի քննարկվել է, այդքան էլ կոռեկտ չէր լինի»:

Ակնկալել, որ այդ ներդրումների արդյունքում էլետրաէներգիայի սակագինը չի բարձանա կամ կիջնի, սպառողը չի կարող: Էֆեկտը, որ կարող է ակնկալել սպառողը, ըստ փոխնախարարի, հուսալի և որակյալ էլեկտրամատակարարումն է: Չնայած, ինչպես նախկին փորձը ցույց է տվել, ՀԷՑ վարկերի սպասարումը մտցվում է էլեկտրաէներգիայի սակագնի մեջ և ի վերջո սպառողն է մարում դրանք, Հայկ Հարությունյանը համոզված է, որ նոր «էլեկտրիկ Երևան» կամ այլ բողոքի ալիք չի բարձրանա:

«Դրական փոփոխությունները, որոնք տեղի են ունեցել էներգետիկ համակարգում, առնվազ հիմք չեն ստեղծում նման բողոքի ակցիաների համար»,- վստահ է փոխնախարարը:

Մանրամասները դիտեք Factor.am-ի հետ ՀՀ էներգետիկ ենթակառուցվածքների և բնական պաշարների փոխնախարար Հայկ Հարությունյանի հարցազրույցում:

Մարինե Խառատյան