16.12.2025 | 20:45
Անհիմն են արգելվել ցույցերը․ 2020-ին հայտարարված ռազմական դրության հետքերով. ՏԵՍԱՆՅՈՒԹ
Նոր ԱԺ-ում «Իմ քայլը» կունենա 6 մշտական հանձնաժողով, ԲՀԿ-ն՝ 2, ԼՀԿ-ն՝ 1
Քաղաքականություն
14.12.2018 | 17:45
Արդեն հայտնի է, թե Ազգային ժողովի ինը մշտական հանձնաժողովները ինչպես են բաժանվելու քաղաքական ուժերի միջև: Ինչպես արդեն հայտնի է 7-րդ գումարման Ազգային ժողովում լինելու է 3 խմբակցություն և 3-ն էլ նախագահելու են որոշակի հանձնաժողովներ:
Հանձնաժողովները խմբակցությունների միջև բաշխվելու են Դոնթի բանաձևով՝ հաշվի առնելով քաղաքական ուժերի մանդատների թիվը: Դոնթի բանաձևի համաձայն՝ Ազգային ժողովի 9 մշտական հանձնաժողովներից 6-ը նախագահելու է «Իմ քայլը» խմբակցությունը, 2-ը՝ «Բարգավաճ Հայաստան» խմբակցությունը և 1-ն էլ բաժին է հասնելու «Լուսավոր Հայաստան» խմբակցությանը:
Դոնթի բանաձևի համաձայն՝ առաջին հանձնաժողովի նախագահությունը ստանձնելու է այն խմբակցությանը, որն ունի աամենաբարձր գործակիցը: Գործակիցը որոշվում է հետևյալ կերպ. խմբակցությունների պատգամավորների թիվը բաժանվում է մեկի, ապա երկուսի և թվերն աճում են այնքան մինչև հանձնաժողովներն ամբողջապես բաժանվեն: Օրինակ, եթե այս պահին «Իմ քայլը» խմբակցության պատգամավորների նախնական թիվը 88-ն է, ապա 88-ը բաժանվում է մեկի և գործակիցը ստացվում է 88: «Բարգավաճ Հայաստան» կուսակցությանը ստացվում է 26 գործակից, իսկ «Լուսավոր Հայաստան» կուսակցությանը 18 գործակից:
Այսպիսով հանձնաժողովի նախագահի առաջին պաշտոնը գնում է «Իմ քայլը» դաշինքին: Այս հաշվարկով ստացվում է, որ նոր ձևավորվող խորհրդարանում «Իմ քայլը» խմբակցությունը կունենա 6, ԲՀԿ-ն՝2, իսկ ԼՀԿ՝ 1 մշտական հանձնաժողովներ նախագահելու հնարավորություն:
Ի դեպ, Ազգային ժողովի առաջին նիստի օրը խմբակցությունները կարող են առաջարկել փոփոխել մշտական հանձնաժողովների թիվը: Օրինակ 5-րդ գումարման ԱԺ-ում դրանք 12-ն են, իսկ 6-րդ գումարման խորհրդարանում՝ 9-ը: Մեր հավաստի տեղեկությունների համաձայն՝ խորհրդարանական մեծամասնություն համարվող «Իմ քայլը» խմբակցությունը նպատակադրված չէ հանձնաժողովների թիվն ավելացնել, քանի որ դա լրացուցիչ ծախս է լինելու բյուջեի վրա:
Բանն այն է, որ պատգամավորների թիվը 105-ից 132-ով փախարինելն արդեն քննարկումների տեղիք է տվել: Բողոքներն այն մասին են, որ դա լրացուցիչ ֆինանսական բեռ է սոցիալական խնդիրներ ունեցող Հայաստանի համար և այն դեպքում, որ պատգամավորները իրենց նեղություն չեն տալիս օրենսդրական նախաձեռնություններով հանդես գալու համար:
Հայկ Վարդանյան
