«64 միլիարդի գող՝ ազգային մեծ բարերա՞ր»․ Փաշինյանը՝ Սամվել Կարապետյանի մասին․ ՏԵՍԱՆՅՈՒԹ
Քաղաքականություն
18.11.2026 | 18:37Ազգային ժողովում Կառավարության հետ հարցուպատասխանի ընթացքում ընդդիմադիր պատգամավոր Անուշ Միրզոյանի և վարչապետ Նիկոլ Փաշինյանի միջև բանավեճ է տեղի ունեցել 44-օրյա պատերազմի, զինծառայողների զոհվելու, Սամվել Կարապետյանի նկատմամբ քրեական հետապնդման, ապօրինի գույքի բռնագանձման և Արցախի դրոշների վերաբերյալ։
Անուշ Միրզոյանը, անդրադառնալով վարչապետի՝ բանակում կատարված գողությունների մասին հայտարարություններին, նշեց, որ Զինված ուժերին վնաս պատճառած բոլոր անձինք պետք է պատասխանատվության ենթարկվեն, եթե նրանց մեղավորությունը հաստատվի դատարանով։ Միաժամանակ նա Փաշինյանին մեղադրեց 44-օրյա պատերազմի ընթացքում հազարավոր զինծառայողների մահվան համար։
«Պարո՛ն Փաշինյան, դուք զորամասերից զինվորներ եք գողացել և տարել եք մահվան հովիտ: Հայ մայրերն ու հայրերը չէին ուզում, որ իրենց որդիները մեռնեին թուրքական բայրաքթարների տակ»,- հայտարարեց պատգամավորը։
Միրզոյանը նաև բարձրացրեց Ադրբեջանի կողմից հետախուզվող հայ նախկին պաշտոնյաների և քաղաքական ու ռազմական գործիչների հարցը։ Նա հիշատակեց Սամվել Կարապետյանին՝ պնդելով, որ Ադրբեջանը նրա նկատմամբ հետախուզում է հայտարարել 2021 թվականից՝ 44-օրյա պատերազմի ընթացքում Հայաստանին ցուցաբերած աջակցության համար։
Պատգամավորը հետաքրքրվեց, թե արդյոք Հայաստանում այդ անձանցից մի քանիսի ազատազրկումը պայմանավորված է Ադրբեջանի հետ խաղաղության գործընթացով։
«Ադրբեջանը հետախուզում է հայտարարել մեր առաջնորդ, ազգային մեծ բարերար Սամվել Կարապետյանի նկատմամբ… Ձեր իշխանության օրոք նրանցից մի մասը փաստացի բանտարկված է հայկական բանտերում… արդյո՞ք դա խաղաղության օրակարգում պահանջ է նրանց ազատազրկելը»,- հարցրեց Միրզոյանը։
Ի պատասխան՝ Նիկոլ Փաշինյանը քննադատեց ընդդիմությանը՝ հայտարարելով, որ նախկինում Ղարաբաղյան շարժման շրջանակում իրականացված քաղաքականությունը հանգեցրել է մարդկային զոհերի։ Վարչապետը նաև ընդդիմադիրներին մեղադրեց պատերազմի և բանակի հաշվին հարստանալու մեջ։
«Դուք մեզ ոչ թե մեղադրում եք իրականում, որ մարդիկ զոհվել են բայրաքթարների տակ, դուք մեզ մեղադրում եք, որ մարդիկ չեն զոհվում բայրաքթարների տակ, որովհետև երբ որ մարդիկ զոհվում են բայրաքթարների տակ, դուք միլիարդատերեր էիք դառնում հերթով… Զինվորների հացը գողացողները հերթով այստեղ կամ նրանց ներկայացուցիչները այստեղ նստած են»,- հայտարարեց Փաշինյանը։
Անդրադառնալով Սամվել Կարապետյանին «ազգային մեծ բարերար» անվանելուն՝ վարչապետը հիշատակեց 64 միլիարդ դրամի վերաբերյալ քրեական գործը՝ Կարապետյանի հասցեին հնչեցնելով գողության մեղադրանքներ։
«Բա այդ 64 միլիարդի քրեական գործը, որ հարուցվել է, ինչի՞ մասին է: Դպրոցներից գողացել եք, զորամասերից գողացել եք, պետությունից գողացել եք, և ազգային մեծ բարերա՞ր: 64 միլիարդի գող՝ ազգային մեծ բարերա՞ր»,- ասաց Փաշինյանը։
Վարչապետը նաև հայտարարեց, որ ապօրինի գույքի բռնագանձման գործընթացը վերաբերելու է բոլոր նրանց, ովքեր ապօրինի միջոցներ են ձեռք բերել՝ անկախ քաղաքական պատկանելությունից։
Նա ընդգծեց, որ իշխանությունը շարունակելու է այդ գործընթացը նաև գործող պաշտոնյաների նկատմամբ՝ հիշատակելով Գագիկ Ծառուկյանին, Ռոբերտ Քոչարյանին և Սամվել Կարապետյանին։
«Որևէ մեկի կոկորդում է մնալու ժողովրդից գողացած ամեն կոպեկ… Մեր իշխանությունից կլինի, ձեր իշխանությունից կլինի, ով ուզում է ըլնի․ ժողովրդից գողացածը կոկորդում է մնալու: …Այսօրվա իշխանության մեջ էլ, ասում եմ պաշտոնապես, ով որ մտածում է, թե իր տարածքը մարսելու է, սխալվում է… Գնալու ենք Ծառուկյանի, Քոչարյանի, Կարապետյանի և մյուսների հետևից, ուզում է ՔՊ-ից լինի, ուզում է նախարարությունից, ով որտեղից ուզում է՝ հետևներից գնալու ենք, կոպեկ գողացածին ուղարկելու ենք քրեակատարողական հիմնարկներ»,- հայտարարեց վարչապետը։
Բանավեճի ընթացքում Փաշինյանն անդրադարձավ նաև ընդդիմության նախկին քաղաքական դիրքորոշումներին և Արցախի դրոշներին։ Նա ընդդիմադիրներին մեղադրեց իրենց նախկինում հռչակած գաղափարներից հրաժարվելու մեջ՝ հարցնելով, թե ինչու են խորհրդարանում իրենց սեղաններից հեռացրել Արցախի դրոշները։
Վարչապետը հայտարարեց, որ ինքն openly (բացահայտորեն) հայտարարել է Ղարաբաղյան շարժումից հրաժարվելու մասին, մինչդեռ ընդդիմադիրները, նրա խոսքով, փոխել են իրենց դիրքորոշումը՝ առանց այդ մասին հանրությանը բացատրություն տալու։
Արձագանքելով Փաշինյանին՝ Անուշ Միրզոյանը հայտարարեց, որ Արցախի դրոշները շարունակում են ծածանվել Եռաբլուր զինվորական պանթեոնում։ Նա կրկին վարչապետին մեղադրեց պատերազմի ընթացքում հազարավոր զինծառայողների զոհվելու համար։
«Ինչ վերաբերում է Արցախի Հանրապետության դրոշին, այդ դրոշները ծածանվում են Եռաբլուր զինվորական պանթեոնում: Դուք գողացել եք հազարավոր զինվորների կյանքեր»,- ասաց պատգամավորը։
Ի պատասխան՝ Փաշինյանը պնդեց, որ նախկինում որոշ ազդեցիկ անձինք իրենց երեխաներին ազատել են զինվորական ծառայությունից, մինչդեռ մյուսների երեխաներն ուղարկվել են պատերազմ։
Վարչապետը նաև հայտարարեց, որ Հայաստանի՝ Ղարաբաղյան շարժումից հրաժարվելու քաղաքական որոշումը հրապարակային է եղել, իսկ ընդդիմությունը, նրա գնահատմամբ, հետևել է այդ քաղաքականությանը՝ առանց սեփական դիրքորոշման փոփոխությունը բացատրելու։
«Ասեցի՝ ղարաբաղյան շարժումը դադարեց, դրոշները գողի նման հանեցիք, որովհետև դուք ենթարկվում եք այն քաղաքական գծին, որ ես եմ որոշում, որովհետև ես ունեմ ժողովրդի լեգիտիմությունը: Իսկ դուք փողի բերումով այստեղ հայտնված մարդիկ եք. հեսա ձեռներիցդ փողերներդ կառնենք, ոնց քաղաքական բոմժ եղել եք, այդպես էլ կդառնաք քաղաքական բոմժ»,- հայտարարեց Փաշինյանը։
Մանրամասները՝ տեսանյութում։
Եվգենյա Համբարձումյան

