07.11.2026 | 10:33
Ռոբերտ Փիլիպոսյանը՝ կայծակնային շախմատի Մ-20 ԱԱ-ի բրոնզե մեդալակիր
Հայաստանը, ԱՄՆ-ն և Ադրբեջանը սկսել են TRIPP-ի տեխնիկական պլանավորման աշխատանքները
Քաղաքականություն
07.11.2026 | 09:42
Լուրեր
07.11.2026 | 09:42
Հայաստանը, ԱՄՆ-ն և Ադրբեջանը սկսել են TRIPP-ի տեխնիկական պլանավորման աշխատանքները
06.11.2026 | 23:10
Եվրոպայում նոյեմբերի 6-ին ավելի քան 15 չվերթի մասով պայթյունի սպառնալիք է ստացվել
Հայաստանի, Միացյալ Նահանգների և Ադրբեջանի ներկայացուցիչները հայտարարել են TRIPP նախագծի շրջանակում տրանսպորտի և էլեկտրաէներգիայի հաղորդման ուղղություններով եռակողմ տեխնիկական պլանավորման խմբերի գործարկման մասին։
Արտաքին գործերի և միջազգային առևտրի նախարարությաբ հաղորդագրությունը՝ ստորև․
«ԱՄՆ պետքարտուղարի՝ Եվրոպայի և Եվրասիայի հարցերով օգնական Բրենդան Հանրահանը, Հայաստանի արտաքին գործերի և միջազգային առևտրի նախարարի տեղակալ Վահան Կոստանյանը և Ադրբեջանի արտաքին գործերի նախարարի տեղակալ Էլնուր Մամեդովն հայտարարել են «Թրամփի ուղի՝ հանուն միջազգային խաղաղության և բարգավաճման» (ԹՐԻՓՓ) բազմամոդալ տարանցիկ ուղու առաջմղման նպատակով եռակողմ տեխնիկական պլանավորման խմբերի աշխատանքների մեկնարկը։ Այս ձևաչափը միավորում է երեք երկրների քաղաքականություն մշակողներին և տեխնիկական փորձագետներին՝ համագործակցաբար աշխատելու և տարածաշրջանում երկարաժամկետ կայունության, տնտեսական կենսունակության, տարածաշրջանային փոխկապակցվածության և առևտրային բարգավաճման ապահովմանը նպաստելու նպատակով՝ վերահաստատելով նախագահ Թրամփի միջնորդությամբ 2025 թվականի օգոստոսի 8-ին կայացած Խաղաղության գագաթնաժողովի անկյունաքարային հռչակագրի նշանակությունը։
Տեսլականը շոշափելի առաջընթացի վերածելու ընդհանուր հանձնառությամբ՝ կողմերը պայմանավորվել են գործարկել եռակողմ տեխնիկական պլանավորման առաջին երկու խմբերը՝ տրանսպորտի և էլեկտրաէներգիայի հաղորդման ուղղություններով։ Տեխնիկական պլանավորման այս խմբերի ձևավորումը կարևոր քայլ է բարդ տեխնիկական հարցերի լուծման և իրականացման հաջորդ փուլերին անցնելու ուղղությամբ, այդ թվում՝ տարածաշրջանային այլ ենթակառուցվածքների հետ կապի ապահովման առումով։
Կողմերը վերահաստատել են ԹՐԻՓՓ-ի բոլոր բաղադրիչների՝ հնարավորինս սեղմ ժամկետներում գործարկումն ապահովելու իրենց համապատասխան հանձնառությունները»։
Հիշեցնենք, որ TRIPP նախագծի ստեղծման մասին պայմանավորվածությունը ձեռք է բերվել 2025 թվականի օգոստոսի 8-ին՝ Վաշինգտոնում ԱՄՆ նախագահ Դոնալդ Թրամփի միջնորդությամբ կայացած եռակողմ հանդիպման արդյունքում։ Հայաստանի վարչապետ Նիկոլ Փաշինյանը, ԱՄՆ նախագահ Դոնալդ Թրամփը և Ադրբեջանի նախագահ Իլհամ Ալիևը ստորագրել են համատեղ հռչակագիր, որով կողմերն ամրագրել են Հայաստանի տարածքով Ադրբեջանի հիմնական հատվածի և Նախիջևանի միջև անխոչընդոտ հաղորդակցություն ապահովելու անհրաժեշտությունը՝ Հայաստանի համար փոխադարձ օգուտներով։
2026 թվականի հունվարի 14-ին հրապարակվել է Հայաստանի և ԱՄՆ-ի միջև TRIPP-ի իրականացման շրջանակը։ Փաստաթղթով նախատեսվում է Հայաստանի տարածքում բազմամոդալ տարանցիկ կապի ստեղծում՝ ինքնիշխանության, տարածքային ամբողջականության և իրավազորության պահպանման սկզբունքներով։ Նախագծի իրականացման համար նախատեսվում է ստեղծել TRIPP Development Company ընկերությունը, որում ԱՄՆ-ին առաջարկվում է 74 տոկոս, Հայաստանին՝ 26 տոկոս բաժնեմաս։
Նոր եռակողմ տեխնիկական խմբերի գործարկումը նախագծի իրականացման հաջորդ փուլն է՝ այս անգամ Հայաստանի, ԱՄՆ-ի և Ադրբեջանի ներկայացուցիչների մասնակցությամբ։
