Քաղաքականություն
12.12.2018 | 16:47Factor.am-ի հարցազրույցը իրավապաշտպան Վարդան Հարությունյանի հետ
– Պարոն Հարությունյան, ինչպե՞ս եք գնահատում մեկնաբանությունները, թե Ռոբերտ Քոչարյանը չպետք է կալանավորվի, քանի որ նա Արցախի հերոս է, նախկին նախագահ է և անձեռնմխելիություն ունի:
– Դե՝ անձեռնմխելիության հարցը դատարանը լուծեց: Չկա բացարձակ անձեռնմխելիություն:
– Պաշտպանները դա համարում են իրավունքների խախտում…
– Ցանկացած մարդ իրավունք ունի պաշտպանվելու, և ցանկացած մարդու կարող են պաշտպանել՝ նրա կողմնակիցները, նրա աջակիցները, նրա գաղափարակիցները, հարազատները: Ռոբերտ Քոչարյանն էլ մարդ է, և նա էլ ունի, եթե ոչ գաղափարակիցներ, ապա աջակիցներ և հարազատներ, որոնք իրավունք ունեն պաշտպանելու նրան: Իսկ անձեռնմխելիության խնդրին անդրադառնալն արդեն տեղին չէ, քանի որ դատարանը տվել է այդ հարցի պատասխանը. չունի ոչ ոք բացարձակ անձեռնմխելիություն և չի էլ կարող ունենալ: Ինչ վերաբերում է հանգամանքներին, որ նա Արցախի հերոս է կամ ծառայություններ է մատուցել հայրենիքին՝ որևէ մեկը դա չի կարող ուրանալ. իրոք նա ծառայություններ մատուցել է, իրոք նա եղել է ղարաբաղյան շարժման ակունքներում, իրոք մասնակիցներից և կազմակերպիչներից մեկն է եղել, բայց այդ բոլոր ծառայությունները չեն կարող ազատել մարդուն պատասխանատվությունից կամ հանցագործություններից, եթե նա դրանք կատարել է: Իսկ կատարել է, թե՞ ոչ, բնականաբար, այդ հարցերի պատասխանները կտա դատարանը:
– Դուք ասում եք, որ անձեռնմխելիության հարցն արդեն դուրս է եկել քննարկումներից, և Ռոբերտ Քոչարյանը կալանավորված է, բայց նրա պաշտպանները հայտարարում են, որ այդ հարցը վիճարկելու են ՄԻԵԴ-ում:
– Փաստաբաններն իրավունք ունեն օրենքով չարգելված ցանկացած ճանապարհով պաշտպանել իրենց պաշտպանյալին՝ և՛ Եվրադատարան պետք է դիմեն, և՛ մեր դատական ատյաններում պետք է այդ խնդիրները բարձրաձայնեն:
– Ձեր կարծիքով՝ ՄԻԵԴ-ում այդ դիմումն ի՞նչ ընթացք կունենա:
– Ես չեմ կարող կանխորոշել, թե Եվրադատարանում ի՞նչ տեղի կունենա, բայց ես կարծում եմ, որ հայաստանյան ատյանները տվել են այդ հարցի պատասխանը, և երբ կհասնի այն փուլը, երբ Եվրադատարանը հայաստանյան իշխանություններին հարցում կուղարկի այդ խնդրի վերաբերյալ, չեմ բացառում, որ հայկական կողմը կկարողանա անհերքելի փաստեր ներկայացնել առ այն, որ որևէ մեկը՝ ոչ միայն Հայաստանում, այլև ամբողջ աշխարհում, չի կարող ունենալ բացարձակ անձեռնմխելիություն:
– Ձեր կարծիքով՝ պետք է ընդլայնվի՞ Մարտի 1-ի գործով մեղադրյալների շարքը և ովքե՞ր պետք է ներգրավվեն այդ ցանկում:
– «Ովքեր» հարցին ես չեմ պատասխանելու, բայց որ պետք է ընդլայնվի՝ դրանում կասկած չկա, որովհետև միայն Ռոբերտ Քոչարյանի ուսերին դնելը սխալ կլինի:
Հարցազրույցի մանրամասները՝ տեսանյութում:
Արմինե Ավետյան
