30.10.2026 | 19:37
Գեղարքունիքի մարզպետի օգնական Սուրեն Գրիգորյանը կգլխավորի ՔՊ-ի ցուցակը Սևանում
Ընտրվելու դեպքում կդադարեցնեմ անդամակցությունը ՀՅԴ-ին․ Մինասյանը՝ հանձնաժողովի անդամ դառնալու մասին․ ՏԵՍԱՆՅՈՒԹ
Քաղաքականություն
30.10.2026 | 16:55
Ազգային ժողովի նիստում Մրցակցության և սպառողների շահերի պաշտպանության հանձնաժողովի անդամի թեկնածու Արծվիկ Մինասյանի և «Քաղաքացիական պայմանագիր» խմբակցության պատգամավոր Վոլոդյա Հակոբյանի միջև քննարկում տեղի ունեցավ թեկնածուի կուսակցական պատկանելիության, ՀՅԴ-ին անդամակցությունը դադարեցնելու և պաշտոնում անկախությունը պահպանելու վերաբերյալ։
Հակոբյանը հիշեցրեց, որ Մինասյանն իր դիմումում նշել էր՝ ընտրվելու դեպքում դադարեցնելու է կուսակցական անդամակցությունը և հետաքրքրվեց, թե ինչու է երկար տարիներ ՀՅԴ անդամ լինելուց հետո պատրաստ նման քայլի։ Նա նաև հարցրեց՝ արդյոք Մինասյանը կկարողանա պաշտոնում իր քաղաքական ու կուսակցական պատկանելիությունը մի կողմ դնել և գործել անկախ։
Մինասյանն ասաց, որ կուսակցական անդամակցության դադարեցումը պայմանավորված է Սահմանադրությամբ և օրենքով նախատեսված պահանջներով։ Նա հիշեցրեց, որ 2005 թվականին, երբ Արժեթղթերի հանձնաժողովի անդամ էր, անկուսակցական էր, իսկ ավելի ուշ՝ քաղաքական գործունեությամբ զբաղվելու ընթացքում, անդամագրվել էր Հայ Հեղափոխական Դաշնակցությանը։
Մինասյանն ընդգծեց, որ ՀՅԴ-ին իր անդամակցությունը միայն ձևական բնույթ չի կրել։ Նրա խոսքով՝ ինքը համոզմունքներով դաշնակցական է, և որևէ պաշտոն չի կարող փոխել մարդու էությունը։
Միաժամանակ նա նշեց, որ անկախ պաշտոն ստանձնելիս պաշտոնատար անձը պարտավոր է իր լիազորություններն իրականացնել անկախ կուսակցական պատկանելիությունից և առաջնորդվել Սահմանադրությամբ ու օրենքով սահմանված պահանջներով։
Հակոբյանը հակադարձեց, որ այդ դեպքում կուսակցական անդամակցության դադարեցումը փաստացի ձևական բնույթ է կրում և արվում է միայն իրավական պահանջները պահպանելու համար։
Մինասյանն իր հերթին ասաց, որ անկախ պաշտոն ստանձնած անձը ոչ միայն ֆորմալ առումով չպետք է կուսակցական լինի, այլև չի կարող ցուցաբերել ակտիվ քաղաքական գործունեությանը բնորոշ վարքագիծ և պարտավոր է պահպանել քաղաքական զսպվածություն։
Նա ընդգծեց, որ նման պաշտոններում օրենսդրական պահանջները նույնն են բոլորի համար՝ անկախ նախկին քաղաքական կամ կուսակցական պատկանելիությունից։
Մանրամասները՝ տեսանյութում։
Եվգենյա Համբարձումյան
