29.10.2026 | 17:01
Կարիերայի առաջին քայլերը՝ IDBank-ի հետ․ մեկնարկել է IDream-ի 16-րդ շրջափուլը
ՌԴ ԶՈՒ-ն Դնեպրում էլեկտրագնացքի է հարվածել․ զոհվել է 13 մարդ
Քաղաքականություն
29.10.2026 | 15:37
Հոկտեմբերի 29-ին ռուսական ուժերը հարձակվել են Դնեպրում քաղաքացիական էլեկտրագնացքի վրա։ Վերջին տվյալների համաձայն՝ զոհվել է 13 մարդ։ Այս մասին հայտնել են քաղաքապետ Բորիս Ֆիլատովը և տեղական ռազմական վարչակազմի ղեկավար Ալեքսանդր Գանժան, փոխանցում է ՌԲԿ Ուկրաինան։
«Դնեպրում ողբերգություն է տեղի ունեցել։ Անօդաչու թռչող սարքը հարվածել է քաղաքացիական էլեկտրագնացքին։ Շատերը զոհվել են, բազմաթիվ վիրավորներ կան»,- գրել է Ֆիլատովը։
Գանժայի խոսքով՝ հայտնի է 13 զոհի մասին։ Հաղորդվում է նաև հինգ տուժած քաղաքացիական անձանց մասին։
«Ռուսաստանի հարձակման հետևանքով Դնեպրում 13 մարդ է զոհվել։ Առնվազն հինգ մարդ վիրավորվել է։ Բժիշկները բոլոր տուժածներին անհրաժեշտ օգնություն են ցուցաբերում»,- հայտարարել է Ալեքսանդր Գանժան։
«Ուկրաինայի երկաթուղիներ» ընկերությունից հայտնել են, որ ռուսական ուժերը ռեակտիվ անօդաչու թռչող սարքերով հարվածել են Դնեպրի երկաթուղային կայարանին։
«Հարվածը հասցվել է հարթակներից մեկին, որտեղ այդ պահին գտնվում էր Դնեպր-Զապորոժիե № 866 գնացքը։ Չնայած հայտարարված վտանգի բարձր մակարդակին՝ հարթակում մարդիկ են եղել։ Կան զոհեր և վիրավորներ»,- ասվում է ընկերության հայտարարության մեջ։
Հարձակման վայրում աշխատում են փրկարարները, բուժաշխատողներն ու իրավապահները։ Անցած գիշեր Ռուսաստանը 112 ԱԹՍ-ներով գրոհել է Ուկրաինայի տարբեր շրջանները։
Թարգմանությունը՝ Էմմա Չոբանյանի
