Ընդդիմության հույսը արտաքին ճնշումն ու «տրիգերն» է․ Ռուբեն Ռուբինյան․ ՏԵՍԱՆՅՈՒԹ

Ազգային ժողովում «Ծառայությունների առևտրի և ներդրումների մասին Հայաստանի Հանրապետության կառավարության և Արաբական Միացյալ Էմիրությունների կառավարության միջև» համաձայնագիրը վավերացնելու մասին նախագծի քննարկման ընթացքում ԱԺ նախագահ Ռուբեն Ռուբինյանն անդրադարձավ ընդդիմության հայտարարություններին, արտահանման ցուցանիշներին և Հայաստանի նկատմամբ, իր խոսքով, կիրառված տնտեսական սահմանափակումներին։

Դիմելով Արամ Վարդևանյանին՝ Ռուբինյանն ասաց, որ եթե ընդդիմությունը ներողություն է ակնկալում իշխանական պատգամավորներից, ապա իրենք էլ պետք է ներողություն խնդրեն այն հայտարարության համար, թե Սամվել Կարապետյանը Հայաստանի հաջորդ վարչապետն է լինելու։

«Եկեք ամբողջ խմբակցությամբ այստեղից ներողություն խնդրեք, որ սուտ եք ասել, որ Սամվել Կարապետյանը Հայաստանի հաջորդ վարչապետն է, որովհետև պարզվեց, որ Հայաստանի հաջորդ վարչապետը Նիկոլ Փաշինյանն էր, ոչ թե Սամվել Կարապետյանը»,- ասաց Ռուբինյանը։

Այնուհետև նա անդրադարձավ ԵԽԽՎ-ի զեկույցին՝ նշելով, որ դրանում գրված է՝ Հայաստանում նախընտրական քարոզարշավի ընթացքում Ռուսաստանը տնտեսական սահմանափակումներ է կիրառել՝ մարդկանց ընդդիմության օգտին քվեարկելուն դրդելու նպատակով։

Ռուբինյանն ասաց, որ այդ համատեքստում ընդդիմության կողմից արտահանման ցուցանիշների, այդ թվում՝ Արաբական Միացյալ Էմիրություններ արտահանված ծաղիկների ծավալների վերաբերյալ հարցադրումները ազնիվ չեն։

Նա նաև անդրադարձավ Նարեկ Կարապետյանի այն դիտարկմանը, թե ընտրություններն արդեն ավարտվել են։ Ռուբինյանը հիշեցրեց ընդդիմադիր գործիչների հայտարարությունները «գաղտնի պլանի» և «տրիգերի» անհրաժեշտության մասին ու պնդեց, որ տնտեսական սահմանափակումները շարունակվում են՝ ընդդիմությանը «տրիգեր» տալու համար։

Ելույթի ավարտին Ռուբինյանն ասաց, որ «խայտառակություն է», երբ Հայաստանում կա ընդդիմություն, որի հույսը, իր ձևակերպմամբ, արտերկրից Հայաստանի դեմ կիրառվող տնտեսական սահմանափակումներն են, և որը «դրսից տրիգերի» է սպասում։

«Առնվազն այդ տրիգերը չի միանում»,- եզրափակեց Ռուբինյանը։

Մանրամասները՝ տեսանյութում։

Եվգենյա Համբարձումյան