Պետական մարմինները կարող են արհամարհել լրագրողի հարցումը, անհիմն մերժել կամ ձևական պատասխաններ տալ․ ՏԵՍԱՆՅՈՒԹ

Խոսքի ազատության պաշտպանության կոմիտեի (ԽԱՊԿ) նախագահ Աշոտ Մելիքյանն անդրադարձել է լրատվական դաշտի ֆինանսական բևեռվածությանը, տեղեկատվության ազատության խախտումներին և մեդիաօրենսդրության բարեփոխումներին։

Մելիքյանի խոսքով՝ լրատվական դաշտում առկա բևեռվածությանը մեծապես նպաստում են քաղաքական ֆինանսական հոսքերը։ Դրանք մեղմելու նպատակով Կառավարությունը հավանություն է տվել Հարկային օրենսգրքի փոփոխությունների փաթեթին, որով քաղաքացիները հնարավորություն կստանան իրենց եկամտահարկից հատկացումներ ուղղել լրատվամիջոցներին, կուսակցություններին և ՀԿ-ներին։

«Ընդհանուր առմամբ դա պետք է դրական գնահատել․ որոշ նոր ֆինանսական աղբյուր է հայտնվում, որը կարող է լցնել որակյալ լրատվամիջոցների բյուջեն և խթանել նրանց գործունեությունն առանց քաղաքական փողերի»,- նշել է ԽԱՊԿ նախագահը։

Միևնույն ժամանակ, նա ընդգծել է, որ դեռևս կան հստակեցման ենթակա չափանիշներ ու պայմաններ, թե որքանով հավասար և թափանցիկ կլինի այդ գործընթացը։

Անդրադառնալով տեղեկություններ ստանալու և տարածելու իրավունքի խախտումներին՝ Աշոտ Մելիքյանը նշել է, որ թեև դրանք նախորդ տարվա նույն ժամանակահատվածի համեմատ կեսով նվազել են, խնդիրը շարունակում է մտահոգիչ մնալ։ 

Արձանագրված 12 խախտումներից․ 5 դեպքում պետական մարմինն անտեսել է պաշտոնական հարցումը, 5 դեպքում հրաժարվել են տրամադրել տեղեկությունը (անհիմն մերժում), 2 դեպքում տրվել են թերի կամ ձևական պատասխաններ (օրինակ՝ 4-5 հարցին մեկ նախադասությամբ պատասխանելը)։

ԽԱՊԿ-ն և գործընկեր լրագրողական կազմակերպություններն ավարտին են հասցնում Հայաստանի մեդիաօրենսդրության բարեփոխման հայեցակարգի մշակումը։ Այն հանրությանը կներկայացվի տարեկան զեկույցի ամփոփման ժամանակ և հիմք կհանդիսանա միջազգային չափանիշներին համապատասխանող նոր օրենքների ստեղծման համար։

ԽԱՊԿ նախագահը նկատել է, որ 9-րդ գումարման Ազգային ժողովում մթնոլորտը դրականորեն փոխվել է․ քաղաքական խոսույթն ավելի մաքուր է, իսկ պատգամավորների վերաբերմունքը լրագրողների նկատմամբ՝ ավելի հարգալից, ինչը նպաստել է լարվածության նվազմանը։

Մանրամասները՝ տեսանյութում։

Եվգենյա Համբարձումյան