21.10.2026 | 22:33
Հայաստանի մի շարք հասցեներում էլեկտրաէներգիայի անջատումներ կլինեն
Պուտինն ու Ուիթկոֆը քննարկել են Ռուսաստան-ԱՄՆ-Ուկրաինա բանակցությունների վերսկսման հնարավորությունը
Քաղաքականություն
21.10.2026 | 20:42
Ռուսաստանի նախագահ Վլադիմիր Պուտինը և ԱՄՆ նախագահի հատուկ բանագնաց Սթիվ Ուիթկոֆը կոնկրետ քննարկում են ունեցել Ռուսաստան-ԱՄՆ-Ուկրաինա ձևաչափով եռակողմ բանակցությունների վերսկսման հարցով։ Այս մասին հայտնում է Ինտերֆաքսը՝ հղում անելով ՌԴ նախագահի օգնական Յուրի Ուշակովին։
«Նախագահը Սթիվ Ուիթկոֆին տեղեկացրել է, որ մենք սկզբունքորեն պատրաստ ենք վերսկսել վերոնշյալ եռակողմ բանակցությունները հիմնական թեմայի վերաբերյալ նոյեմբերի առաջին տասնօրյակում։ Այդ թեման վերաբերում է Ռուսաստանի և Ուկրաինայի համար անվտանգության համակարգի կառուցմանը հակամարտության ավարտից հետո»,- լրագրողներին ասել է Ուշակովը։
Նրա պնդմամբ՝ բանակցությունների վերսկսումը, որը նախատեսվում էր անմիջապես Պետդումայի ընտրություններից հետո, «տապալել է ուկրաինական ռեժիմը՝ քվեարկության հիմնական օրը չափազանց զանգվածային հարվածներ հասցնելով Մոսկվային, այլ քաղաքներին, ընտրատեղամասերին և անմիջականորեն ընտրական հանձնաժողովների աշխատակիցներին, որոնցից ոմանք զոհվել են», փոխանցում է BBC-ի ռուսական ծառայությունը։
Ուշակովը նաև հայտնել է, որ Պուտինը զրուցակցին ներկայացրել է շփման գծում տիրող իրավիճակի օբյեկտիվ պատկերը՝ նշելով, որ ռազմավարական նախաձեռնությունն ամբողջությամբ ռուսական զորքերի ձեռքում է։
Հոկտեմբերի սկզբին Ուկրաինայի նախագահ Վլադիմիր Զելենսկին հայտարարել էր, որ Վաշինգտոնը ցանկանում է մինչև հոկտեմբերի վերջ կազմակերպել Ուկրաինայի, ԱՄՆ-ի և Ռուսաստանի պատվիրակությունների նոր հանդիպում։ Նրա խոսքով՝ քննարկվում էր նման հանդիպումը մինչև ամսվա ավարտն անցկացնելու հնարավորությունը։ Զելենսկին նշել էր, որ Ուկրաինան պատրաստ է աջակցել այդ բանակցությունների անցկացմանը։
Թարգմանությունը՝ Էմմա Չոբանյանի
