Պուտինն օրվա առաջին կեսին կընդունի Ուիթկոֆին․ հանդիպման գլխավոր թեման ուկրաինական կարգավորումն է

ՌԴ նախագահ Վլադիմիր Պուտինը չորեքշաբթի օրվա առաջին կեսին Սանկտ Պետերբուրգում կընդունի ԱՄՆ նախագահի հատուկ բանագնաց Սթիվ Ուիթկոֆին։ Այս մասին հայտնել է Պուտինի օգնական Յուրի Ուշակովը։

«Այո, Պուտինը կընդունի Ուիթկոֆին։ Հանդիպումը տեղի կունենա Կոնստանտինովյան պալատում։ Միջոցառումը նախատեսված է այսօր՝ օրվա առաջին կեսին»,- լրագրողներին ասել է նա։

Պատասխանելով հարցին՝ արդյո՞ք հանդիպմանը կմասնակցի նաև Թրամփի փեսան՝ Ջարեդ Քուշները, Ուշակովը նշել է. «Մեզ հայտնել են, որ Քուշները մի փոքր հիվանդացել է և հրաժարվել ուղևորությունից։ Որքան գիտեմ՝ նա չի եղել նաև Նորվեգիայում։ Միայն Ուիթկոֆն է հանդիպել մի շարք եվրոպացի ներկայացուցիչների, ինչպես նաև Զելենսկիի հետ»։

Ռուսաստանի նախագահի օգնականի խոսքով՝ Պուտինի և Ուիթկոֆի հանդիպումը ծրագրված էր դեռ մի քանի օր առաջ։

«Նրանց համար, ովքեր պատրաստում էին այս միջոցառումը, որևէ գաղտնիք չկար»,- հավելել է նա։

Ուշակովը նաև հաստատել է, որ հանդիպմանը կմասնակցի Ռուսաստանի նախագահի՝ օտարերկրյա պետությունների հետ ներդրումային և տնտեսական համագործակցության հարցերով հատուկ ներկայացուցիչ Կիրիլ Դմիտրիևը։ Նա շեշտել է, որ Պուտինի և Ուիթկոֆի հանդիպման գլխավոր թեման կլինի ուկրաինական հակամարտության կարգավորումը։

«Չգիտեմ՝ այսօր որևէ պայմանավորվածություն ձեռք կբերվի՞, թե՞ ոչ, բայց ուկրաինական հակամարտության շուրջ բանակցությունները, բնականաբար, այսօրվա շփումների գլխավոր  մասն են լինելու»,- լրագրողներին ասել է նա։

Թարգմանությունը՝ Էմմա Չոբանյանի