Գագիկ Խաչատրյանը չի բերվել դատարան՝ չնայած ցանկություն էր հայտնել մասնակցել նիստին

ՊԵԿ նախկին նախագահ, ֆինանսների նախկին նախարար Գագիկ Խաչատրյանը չի բերվել դատարան՝ չնայած այն հանգամանքին, որ երեկ ուշ երեկոյան դիմում է մուտքագրվել դատարան, որում նա ցանկություն է հայտնել մասնակցել նիստին:

Նշենք, որ դատարանն ավելի վաղ թույլատրել էր, որպեսզի Խաչատրյանը չմասնակցի նիստերին, սակայն այժմ նա որոշել է մասնակցել՝ չնայած առողջական վիճակին:

Դիմումը դատարան մուտքագրվել էր փաստաբան Ամրամ Մակինյանի կողմից: Վերջինը դատարանում քննվող գործով ներգրավված չի եղել որպես Խաչատրյանի պաշտպան: Դատարան մուտքագրված գրության մեջ Գագիկ Խաչատրյանը ոչ միայն նշել էր, որ ցանկանում է մասնակցել նիստերին, այլև որ այսուհետ ցանկանում է, որ իր շահերը ներկայացնի նաև Մակինյանը:

Հանրային մեղադրող Գևորգ Սարգսյանը դիրքորոշում հայտնեց, որ դիմումը դատարան է ստացվել ոչ պատշաճ սուբյեկտի, այն է՝ գործում չներգրավված պաշտպանի կողմից, ուստի նույնիսկ քննության ենթակա լինել չի կարող: Միաժամանակ, Սարգսյանն այս գործելաոճը համարեց պաշտպանների կողմից նիստերը ձգձգելու հերթական փորձը:

Պաշտպան Երեմ Սարգսյանը, սակայն, նշեց որ առկա է մեղադրյալի գրավոր համաձայնությունը, որպեսզի Ամրամ Մակինյանը ստանձնի մեղադրյալի պաշտպանությունը, ուստի Մակինյանը գրավոր համաձայնության առկայության պահից համարվում է Գագիկ Խաչատրյանի պաշտպանությունը ստանձնած փաստաբան:

Միաժամանակ, պաշտպան Սարգսյանը նշեց, որ հանրային մեղադրողն անհիմն հայտարարություն է անում այն մասին, որ իրենք նիստերը ձգձգելու միտում ունեն: Նա դատարանին տեղյակ պահեց, որ Գագիկ Խաչատրյանը չի առարկել, որպեսզի իր ներկայությունն ապահովելու անհնարինության դեպքում այսօրվա նիստն անցկացվի իր բացակայությամբ:

Նկատի ունենալով մեղադրյալի դիրքորոշումը՝ դատարանը որոշեց այսօրվա նիստը շարունակել նրա բացակայությամբ:

Արաքս Մամուլյան