Երեք ամսից ՌԴ-ն կասի` երկաթուղում ներդրում անո՞ւմ է, թե՞ ոչ. Փաշինյան. ՏԵՍԱՆՅՈՒԹ

ՀՀ վարչապետ Նիկոլ Փաշինյանը լրագրողների հետ ճեպազրույցի ժամանակ անդրադարձավ երկաթուղու ոլորտում ռուսական ներդրումների հավանականությանը, երկաթգծի վագոնների վաճառքի հետ կապված քրեական վարույթին, ինչպես նաև անկլավների վարչատարածքային հարցերին։

Վարչապետ Նիկոլ Փաշինյանի որոշմամբ ձևավորվել է աշխատանքային խումբ, որին համաձայնությամբ ներգրավվելու են նաև Ռուսաստանի ներկայացուցիչները։ Աշխատանքային խումբը պետք է պատասխանի ՀՀ կառավարության ձևակերպած կոնկրետ հարցերին, որոնցից մեկն էլ այն է, թե արդյոք ռուսական կողմը պատրաստ է ներդրումներ անել երկաթուղու ոլորտում։

«Երեք ամիս հետո մենք այդ հարցի պատասխանը կիմանանք և այդ հարցից բխող արդեն հետագա գործողությունները կանենք»,- հայտարարեց վարչապետը։

Լրագրողի հարցին ի պատասխան՝ կապված տրանսպորտի նախկին նախարար Անդրանիկ Մանուկյանի օրոք երկաթգծի վագոնների վաճառքի և հնարավոր կոռուպցիոն գործարքների հետ, Նիկոլ Փաշինյանը տեղեկացրեց, որ վագոնների վաճառքի փաստով իրականում քրեական վարույթ կա, և քննություն է ընթանում։

Միևնույն ժամանակ, վարչապետը Գլխավոր դատախազի և Քննչական կոմիտեի նախագահի ուշադրությունն հրավիրեց լրագրողի մատնանշած դեպքի վրա՝ հանձնարարելով քննել այն։

Անդրադառնալով Արծվաշենի և մյուս տարածքների վերաբերյալ հարցին՝ Նիկոլ Փաշինյանը պարզաբանեց, որ «տեղաշարժել» ասելով նկատի ունի վարչատարածքային փոխանակումները։ Խոսքը վերաբերում է Քյարքիի, Բարխուդարլուի, Ասկիպարայի (Վերին Ոսկեպար) և Արծվաշենի տարածքներին։

Մանրամասները՝ տեսանյութում։

Եվգենյա Համբարձումյան