15.09.2026 | 17:33
Աջակցում ենք ՀՀ-ի հետ խաղաղությանը․ Հաքան Ֆիդանը՝ Բաքվում
«Վալդայ» ակումբի նիստն ուկրաինական հարվածների սպառնալիքի պատճառով Սոչիից տեղափոխվել է Մոսկվայի մարզ․ FT
Քաղաքականություն
15.09.2026 | 16:26
«Վալդայ» քննարկումների ակումբի ամենամյա նիստը Սոչիից տեղափոխվել է Մոսկվայի մարզ՝ ուկրաինական զինուժի հարվածների սպառնալիքի պատճառով։ Այս մասին գրում է Financial Times-ը, փոխանցում է Meduza-ն։
Պարբերականի աղբյուրները հայտնել են, որ մասնակիցներին նախապես ուղարկված հրավերներում որպես միջոցառման անցկացման վայր նշված է եղել Սոչին, սակայն օգոստոսի վերջին նրանց տեղեկացրել են անցկացման վայրի փոփոխության մասին։ FT-ի երկու զրուցակիցների խոսքով՝ նիստը տեղափոխելու որոշումն ընդունվել է ՌԴ նախագահ Վլադիմիր Պուտինի անվտանգության ծառայության պնդմամբ։
Սեպտեմբերի կեսի դրությամբ՝ միջոցառման կայքում նշվում է, որ «Վալդայ» միջազգային քննարկումների ակումբի XXIII ամենամյա նիստը կանցկացվի սեպտեմբերի 28-ից հոկտեմբերի 1-ը Մոսկվայի մարզում։ Նիստի թեման է՝ «Պատասխանատվություն ապագայի համար․ հնարավորի սահմաննե՞ր, թե՞ անսահման հնարավորություններ»։
FT-ի կարծիքով՝ «Վալդայ» ակումբի նիստի անցկացման վայրի տեղափոխումը «հերթական վկայությունն» է «աճող սպառնալիքի», որը ներկայացնում են Ուկրաինայի՝ Ռուսաստանի հետ սահմանից զգալի հեռավորության վրա իրականացվող հրթիռային հարվածները։
Լրատվամիջոցը նշում է, որ այժմ անձամբ Պուտինը չափազանց հազվադեպ է այցելում Սոչի, որտեղ գտնվում է նրա նստավայրերից մեկը։ Լրագրողների հաշվարկներով՝ վերջին երկու տարվա ընթացքում ՌԴ նախագահը Սոչի այցելել է ընդամենը երկու անգամ, վերջին անգամ՝ 2025 թվականի հոկտեմբերին, երբ նա մասնակցել է «Վալդայ» ակումբի նիստին։ Իսկ 2021 թվականին՝ մինչև լայնածավալ պատերազմի սկիզբը, Պուտինը Սոչի էր մեկնել 24 անգամ։
«Վալդայը» քննարկումների ակումբ է, որը 2004 թվականին հիմնադրել են մի քանի փորձագետներ։ Ակումբի նիստերին մասնակցում են ռուսաստանցի պաշտոնյաներ, օտարերկրյա քաղաքական գործիչներ և լրագրողներ։ Տարին մեկ անգամ, որպես կանոն, դրանց մասնակցում է նաև Վլադիմիր Պուտինը։
Ուկրաինացի զինվորականները բազմիցս հարվածներ են հասցրել Ռուսաստանի՝ Սև ծովի ափին գտնվող թիրախներին, այդ թվում՝ Սոչիի նավթավերամշակման գործարանին։ Սեպտեմբերի 9-ի երեկոյան ուկրաինական ծովային անօդաչու սարքերը հարձակվել էին Սոչիի վրա, ինչի հետևանքով տուժել էր շուրջ 30 մարդ։
Թարգմանությունը՝ Էմմա Չոբանյանի
