Այցը ցույց տվեց՝ ինչպես խաղաղությունը կարող է նոր հնարավորություններ ստեղծել Հարավային Կովկասի համար․ Բաքվում ԱՄՆ դեսպանատունը՝ գործերի հավատարմատարի Արցախ այցի մասին

«Ժամանակավոր հավատարմատար Կարլոնը մասնակցել է Ադրբեջանի ԱԳՆ-ի կողմից Խանքենդի (Ստեփանակերտ) և Շուշա (Շուշի) կազմակերպված այցին, որի ընթացքում նա և դիվանագիտական այլ առաքելությունների ղեկավարներ ծանոթացել են տարածաշրջանի մշակութային ժառանգությանը և տնտեսական առաջընթացին»։ Այս մասին ասվում է Բաքվում ԱՄՆ դեսպանատան հայտարարության մեջ Ադրբեջանում ԱՄՆ գործերի հավատարմատար Էմի Կարլոնի՝ Արցախի տարածքներ այցի վերաբերյալ։

Նշվում է, որ «Խանքենդիում գործերի ժամանակավոր հավատարմատար Կարլոնն այցելել է  երկաթուղային և ավտոբուսային կայարանների համալիր, մշակութային կենտրոն, «Հաղթանակի» զբոսայգի, Խանքենդիի մարզադաշտ, Ղարաբաղի համալսարան և տեղական կարի ֆաբրիկա։ Շուշայում նա այցելել է կարևոր վայրեր, այդ թվում՝ Շուշիի նոր մզկիթը, Աշաղի Գովհար Աղա մզկիթը, քաղաքի կենտրոնական հրապարակ, ստեղծագործական կենտրոնը և Շուշայի պատմական ամրոցի պարիսպները»։

Հաղորդագրությունում Ստեփանակերտն ու Շուշին նշվում են ադրբեջանական տարբերակներով՝ Խանքենդի ու Շուշա։

«Այս այցը ցույց տվեց, թե ինչպես խաղաղությունն ու համագործակցությունը կարող են նոր հնարավորություններ ստեղծել տարածաշրջանային կապակցվածության, առևտրի, ներդրումների և Ադրբեջանի ու Հարավային Կովկասի բարգավաճման համար»,- ասվում է հայտարարության մեջ։

Հիշեցնենք, որ ավելի վաղ Բաքուն հայաթափված Արցախի շրջաններ հերթական քարոզչական այցն էր կազմակերպել, այս անգամ՝ Ադրբեջանում հավատարմագրված օտարերկրյա դիվանագիտական ​​կորպուսի ներկայացուցիչների։

Հավելենք, որ Ադրբեջանի նախագահ օգնական Հիքմեթ Հաջիևը, որն ուղեկցել էր Ադրբեջանում հավատարմագրված դիվանագիտական կորպուսի ներկայացուցիչներին  Արցախի տարածքներ, հայկական Գանձասարի ու Դադիվանք վանքերի անվանումները նախ նենգափոխել էր ու անվանել Գանջասար և Խուդավենք, նաև կեղծել պատմությունը՝ դրանք ներկայացնելով որպես «հնագույն աղվանական քրիստոնեական ժառանգության անբաժանելի մասը»։ Հաջիևը նշել էր, թե Գանձասարը հիմնադրել է 13-րդ դարում Կովկասյան Աղվանքի կառավարիչ Հասան-Ջալալը և  «օկուպացիայի տարիներին այդ հուշարձանները ենթարկվել են արտաքին միջամտությունների՝ կեղծ «վերականգնման» քողի ներքո, ինչը խաթարել է դրանց ճարտարապետական ​​իսկությունն ու սկզբնական կերպարը»։

Թարգմանությունը՝ Էմմա Չոբանյանի