Թրամփը դեմ է արտահայտվել արհեստական բանականության զարգացումը դանդաղեցնելու կոչերին

ԱՄՆ նախագահ Դոնալդ Թրամփը դեմ է արտահայտվել արհեստական բանականության զարգացումը դանդաղեցնելու կոչերին և տեխնոլոգիայի քննադատներին անվանել «շատ բացասական ուժեր», փոխանցում է Meduza-ն։

«Մենք արհեստական բանականության ոլորտում առաջ ենք Չինաստանից։ Մենք աշխարհի տեխնոլոգիապես ամենազարգացած երկիրն ենք և, անկեղծ ասած, ցանկանում եմ, որ այդպես էլ մնա, որովհետև ով հաղթի արհեստական բանականության մրցավազքում, ի վերջո, կհաղթի ամեն ինչում»,- հայտարարել է Թրամփը։

Նա հավելել է, որ, անհրաժեշտության դեպքում, ԱՄՆ-ը կարող է լրացուցիչ սահմանափակումներ սահմանել արհեստական բանականության ոլորտում գործող ընկերությունների նկատմամբ։ Սակայն, նրա խոսքով, ներկայում տեխնոլոգիայի բազմաթիվ քննադատներ խոսում են այնպիսի ռիսկերի մասին, որոնք «տեղի չեն ունենա»։

Նշենք, որ սեպտեմբերի 12-ին Anthropic ընկերության ղեկավար Դարիո Ամոդեին հրապարակում էր արել, որում առաջարկել էր դանդաղեցնել առավել առաջադեմ արհեստական բանականության մոդելների մշակումը, որպեսզի ընկերություններն ու իշխանություններն ավելի շատ ժամանակ ունենան անվտանգության միջոցներ մշակելու համար։ Ամոդեին նշել էր, որ արհեստական բանականության մոդելների աճող հնարավորություններն ու ինքնակատարելագործվելու ունակությունը մտահոգում են իրեն, և որպես օրինակ բերել է Hugging Face հարթակի վերջին կոտրման դեպքը։

Նույն օրը Ամոդեիի առաջարկին աջակցել էին OpenAI-ի ղեկավար Սեմ Ալթմանը և Իլոն Մասկը։ OpenAI-ը նույնպես հրաժարվել է նախկինում նախատեսված IPO-ի անցկացումից։ Reuters-ին տված հարցազրույցում Ալթմանը հայտարարել է, որ չի ցանկանում, որպեսզի ֆինանսական խթաններն անվտանգության հարցերը մղեն երկրորդ պլան։

Չինաստանում արհեստական բանականության ոլորտի առաջատարների կոչերի արձագանքը նման է եղել Թրամփի դիրքորոշմանը։ Պետական Global Times թերթը Anthropic-ի ղեկավարի առաջարկներն անվանել է «սառը պատերազմի մեթոդական ձեռնարկ»։

Իր հրապարակման մեջ Ամոդեին Չինաստանի հետ մրցակցությունը նշել է որպես ոլորտի զարգացումը դանդաղեցնելու գլխավոր խոչընդոտ և կոչ է արել սահմանափակել Չինաստանին առաջադեմ չիպերի վաճառքը։

Թարգմանությունը՝ Էմմա Չոբանյանի