Հայկական կոթողների ոչնչացման ֆոնին՝ Ալիևի օգնականը խոսել է Ղարաբաղում մշակութային ժառանգության պաշտպանության մասին

«Խոսելով Ղարաբաղի մասին՝ անհնար է չանդրադառնալ մշակութային ժառանգությանը։ Ղարաբաղը եղել է, մնում է և կլինի Ադրբեջանի ու ադրբեջանցի ժողովրդի մշակութային սիրտը»,- Ստեփանակերտի մշակութային կենտրոն այցելած դիվանագիտական կորպուսի ներկայացուցիչներին ուղղված խոսքում հայտարարել է Ադրբեջանի նախագահի օգնական, Ադրբեջանի նախագահի աշխատակազմի արտաքին քաղաքականության հարցերով վարչության ղեկավար Հիքմեթ Հաջիևը։

Նա կրկին կեղծ մեղադրանքներ է հնչեցրել հայկական կողմի հասցեին։

«Օկուպացիայի տարիներին Ադրբեջանի մշակութային ժառանգությունը ենթարկվել է ոչնչացման։ Սակայն մենք վերականգնում ենք ադրբեջանական ժողովրդի մշակութային ժառանգությունը։ Ղարաբաղում և Ադրբեջանի այլ տարածքներում գտնվող ամբողջ մշակութային ժառանգությունն Ադրբեջանի մշակութային ժառանգությունն է։ Այն պաշտպանվում է մեր օրենսդրությամբ, միաժամանակ, այն պաշտպանված է միջազգային իրավունքով։ Մենք շարունակելու ենք լրացուցիչ ջանքեր գործադրել մշակութային ժառանգության վերականգնման, վերակառուցման և պահպանության ուղղությամբ»,- հայտարարել է Հիքմեթ Հաջիևը։

Հաջիևի այս հայտարարությունները հնչում են Արցախում հայկական պատմամշակութային ու կրոնական հուշարձանների  համատարած քանդման ու ոչնչացման  ֆոնին։ Ընդամենը օրեր առաջ Caucasus Heritage Watch կազմակերպությունը հայտնել էր Ադրբեջանի կողմից Շուշիի հին հայ-ռուսական գերեզմանոցի ոչնչացման մասին՝ արբանյակային լուսանկարների վերլուծության հիման վրա: Գերեզմանոցում գտնվել են միջնադարյան հայկական խաչքարեր և 19-րդ դարի հայկական ու ռուսական տապանաքարեր, որոնք թվագրվում են 1810-1871 թվականներով։ CHW-ի տվյալներով՝ գերեզմանոցի ավերումը տեղի է ունեցել 2026 թվականի մայիսի 9-ից 14-ն ընկած ժամանակահատվածում:

Վերջին աղմկահարույց դեպքերից է նաև Ադրբեջանի իշխանությունների կողմից Ստեփանակերտի Սուրբ Աստվածամոր Հովանու Մայր տաճարի քանդումը։

Թարգմանությունը՝ Էմմա Չոբանյանի