Պուտինն ուզում է վարկաբեկել Փաշինյանին․ պահանջում է հանրաքվե, որ ԵՄ-ին ցույց տա՝ նա Սերժ Սարգսյանից չի տարբերվում․ Լուսինե Հակոբյան․ ՏԵՍԱՆՅՈՒԹ

«Իրավունքի Եվրոպա» հասարակական կազմակերպության ղեկավար, իրավապաշտպան Լուսինե Հակոբյանը Factor TV-ի հետ զրույցում անդրադարձել է Հայաստանում Ռուսաստանի «փափուկ ուժի» ակտիվացմանը, դատաիրավական համակարգի բարեփոխումների ընթացքին, քաղբանտարկյալների առկայության շուրջ քննարկումներին և ԵՄ-ի հետ հարաբերությունների հեռանկարին։

Անդրադառնալով Հայաստանում ռուսական «փափուկ ուժի» ակտիվացմանը, մասնավորապես՝ «Ռուսական տների» բացմանը, Հակոբյանը նման զարգացումը համարեց անցանկալի՝ «հաշվի առնելով ներկայիս հարաբերությունների կոնտեքստը»։ Նա հիշեցրեց, որ նախկինում հենց «փափուկ ուժի» ներգործությունը չեզոքացնելու տրամաբանությունից ելնելով է կրթական չափորոշիչներից հանվել ռուս գրականությունը՝ որպես առանձին առարկա։

«Ես, իհարկե, ոչինչ չունեմ ռուս գրականության դեմ, արժեքավոր գործեր են գրել ռուս գրողները, և դրանք, բնականաբար, ուսումնասիրության առարկա պետք է դառնան մեր դպրոցական ծրագրերում։ Բայց ճիշտ է արվել, որ որպես առանձին դիսցիպլին՝ դա հանվել է ուսումնական ծրագրից և ներառվել է արտասահմանյան գրականության կամ առհասարակ գրականության առարկայի ներքո։ Եվ դա հենց արվել է «փափուկ ուժի» այդ ներգործությունը բացառելու համար», – ընդգծեց նա՝ հավելելով, որ այս պարագայում «այդ տները բացելը, բնականաբար, նպատակահարմար չէ»։

Իրավապաշտպանը մտահոգիչ համարեց նաև Ռուսաստանի իշխանությունների միջամտությունը Հայաստանի ներքին գործերին, մասնավորապես՝ ԵՄ անդամակցության հանրաքվեի թեմայի շուրջ։

«Վլադիմիր Պուտինը հստակ, այսպես, նշաններով, քայլերով, խոսքերով միջամտում է կամ այդ հետևողականորեն պնդում է, որ «այ դուք հիմա պետք է այդ հանրաքվեն անցկացնեք Եվրամիությանն անդամակցելու թեմայով»… դա էլ է այսպես հարցեր առաջացնում՝ ի՞նչ նպատակով է դա արվում, ինչու՞ է այդպիսի կոշտ և անթաքույց մեթոդներով փորձ կատարվում միջամտելու Հայաստանի ներքին գործերին», – ասաց Հակոբյանը։

Նրա կարծիքով, ռուսական կողմի այս պահանջը նպատակ ունի ոչ թե ազդել Հայաստանի ներքին լսարանի վրա, այլ «եվրոպացիների աչքում Փաշինյանին վատ լույսի ներքո ներկայացնելու համար՝ ցույց տալու, որ Սերժ Սարգսյանից նա շատ չի տարբերվում»։

Խոսելով ընդդիմադիր գործիչների կալանքի և նրանց «քաղբանտարկյալ» որակելու պահանջների մասին՝ Լուսինե Հակոբյանը նշեց հետաքրքիր միտում։

«Հետաքրքիր է, որ Հայաստանի ընդդիմադիր դաշտը մշտապես այդ պահանջները՝ Հայաստանում մարդու իրավունքների պաշտպանության վիճակի վրա ուշադրություն դարձնելու վերաբերյալ պահանջները միշտ ուղղել է Արևմուտքին, սակայն ոչ երբեք՝ Ռուսաստանին։ Սա էլ է հետաքրքիր չափում։ Ինչու՞։ Որովհետև Հայաստանի ընդդիմությունը երբեք էլ չի համարել, որ Ռուսաստանը ժողովրդավարական պետություն է և պետք է ասելիք ունենա Հայաստանում մարդու իրավունքների պաշտպանության վիճակի վերաբերյալ», – վերլուծեց նա։

Հարցին, թե արդյոք Հայաստանում այսօր կան քաղբանտարկյալներ, Հակոբյանը տվեց հստակ պատասխան.

«Հայաստանում քաղբանտարկյալներ չկան։ Եվ դա իմ գնահատականը չէ, դա միջազգային կառույցների գնահատականն է։ Բայց սա չի նշանակում, որ մարդու իրավունքների հետ կապված խնդիրներ Հայաստանում չկան։ Քաղհասարակությունը այդ պատճառով էլ շարունակում է իր վերահսկողական գործառույթը, հանրային հսկիչի իր դերակատարումը, և ժամանակ առ ժամանակ խնդիրները բարձրաձայնում է»։

Հարցազրույցն ամբողջությամբ՝ տեսանյութում։

Ռոբերտ Անանյան