Առաջիկայում հնարավոր է գլխավոր դատախազը գա ԱԺ՝ Ծովինար Վարդանյանին մեղադրյալ ներգրավելու հարցով․ Էդգար Ղազարյան․ ՏԵՍԱՆՅՈւԹ

Ազգային ժողովի պատգամավոր Էդգար Ղազարյանը կոչ է արել ֆինանսավարկային և բյուջետային հարցերի մշտական հանձնաժողովի անդամներին դեմ քվեարկել «Քաղաքացիական պայմանագիր» խմբակցության պատգամավոր Ծովինար Վարդանյանի թեկնածությանը՝ հանձնաժողովի նախագահի տեղակալի պաշտոնում։ Ղազարյանի պնդմամբ՝ Վարդանյանը «շատ անհաջող և տվյալ պաշտոնին չհամապատասխանող թեկնածու է»։

Էդգար Ղազարյանն իր ելույթում ընդգծել է, որ Ծովինար Վարդանյանը նախկինում երկար ժամանակ զբաղեցրել է նույն հանձնաժողովի նախագահի պաշտոնը և, ըստ նրա գնահատականի, «տապալել է իր առաքելությունը»։

Էդգար Ղազարյանը ներկայացրել է նաև Վարդանյանի պաշտոնական գործունեության հետ կապված մեկ այլ դրվագ, որը վերաբերում է քաղաքացիների ընդունելությանը։ Նրա հայտնած տվյալներով՝ 2025 թվականի հունիսի 24-ին, երբ ինքը որպես քաղաքացի ներկայացել է ԱԺ ընդունարան, Վարդանյանը մյուս բոլոր քաղաքացիներին ընդունել է, սակայն հրաժարվել է ընդունել միայն իրեն․ «Այսինքն՝ մյուս բոլոր քաղաքացիները ընդունելության են արժանացել, իսկ իմ նկատմամբ ցուցաբերել է, որպես հանրային ծառայող-պաշտոնյա, խտրական վերաբերմունք»։

Ղազարյանը հայտնել է, որ նշված խտրական վերաբերմունքի դեպքով հանցագործության մասին հաղորդում է ներկայացրել դատախազություն և դատական գործընթացով հասել է մինչև Վճռաբեկ դատարան՝ շահելով դատը։ Ըստ Ղազարյանի՝ այժմ Քննչական կոմիտեի Արաբկիրի քննչական բաժնում նախաձեռնված է քննչական վարույթ՝ հիմնավոր կասկածի հիման վրա․ «Կարծում եմ, որ առաջիկայում հնարավոր է գլխավոր դատախազը միջնորդությամբ գա Ազգային ժողով՝ տիկին Վարդանյանին որպես մեղադրյալ ներգրավելու և, միգուցե, խափանման միջոց կիրառելու միջնորդությամբ։ Ես կարծում եմ, որ այդպիսի պաշտոնական գործունեության ակտիվով գործիչը չի կարող հավակնել նման բարձր պաշտոնի»։

Ամփոփելով խոսքը՝ Ղազարյանը վերահաստատել է իր կոչը հանձնաժողովի պատգամավորներին՝ դեմ քվեարկել Ծովինար Վարդանյանի թեկնածությանը։

Նշենք, որ հանձնաժողովի «Ուժեղ Հայաստանի» անդամները դեմ են քվեարկել Վարդանյանի թեկնածությունը, այդ թվում՝ հանձնաժողովի ընդդիմադիր նախագահը, սակայն ՔՊ-ականների ձայները բավարարել են, որպեսզի Ծովինար Վարդանյանը ընտրվի հանձնաժողովի փոխնախագհ։

Մանրամասները՝ տեսանյութում։

Եվգենյա Համբարձումյան