Տուգանելու ենք միջմարզային տրանսպորտի տերերին. Երևանի փոխքաղաքապետ․ ՏԵՍԱՆՅՈՒԹ

Երևանի քաղաքապետարանը մտադիր չէ արգելել մարզային տրանսպորտի մուտքը մայրաքաղաք, սակայն թույլ չի տալու, որ միջմարզային երթուղիները Երևանի ներսում կանգառից կանգառ ուղևորափոխադրումներ իրականացնեն և կրկնակի ծանրաբեռնեն փողոցները։ Կանոնները խախտող տնտեսվարողների նկատմամբ կկիրառվի վարչարարություն և տուգանքներ։ Այս մասին լրագրողների հետ ճեպազրույցում հայտարարեց Երևանի փոխքաղաքապետ Սուրեն Գրիգորյանը։

Պարզաբանելով քաղաքապետ Տիգրան Ավինյանի տված հանձնարարականը՝ Գրիգորյանը շեշտեց․

«Երևան քաղաքում ներքաղաքային հանրային տրանսպորտը սպասարկում են բացառապես համայնքային կառույցները՝ «Երևանի ավտոբուս», «Երևանի էլեկտրատրանսպորտ» և «Երևանի մետրոպոլիտեն» ՓԲԸ-ները։ Մարզային տրանսպորտը պետք է ուղևորին համապատասխան մարզից հասցնի քաղաքի վերջնակետ՝ օրինակ՝ ավտոկայան, այլ ոչ թե Երևանի ներսում ամեն կանգառում կանգնի, զուգահեռ գործունեություն ծավալի ու մարդ վերցնի-իջեցնի»։

Փոխքաղաքապետի խոսքով՝ մեծ չափեր ունեցող ավտոբուսների կողմից քաղաքի կանգառներում կայանելը լրացուցիչ խցանումներ է առաջացնում։ Դիտարկմանը, թե արդյոք վարչարարությունը վերաբերելու է նաև Գագիկ Ծառուկյանին վերագրվող Աբովյանի գծերին, Գրիգորյանը պատասխանեց․

«Ծառուկյանը ավտոբո՞ւս է վարում․․․ Մենք վարչարարություն իրականացնելու ենք կանոնը խախտող սուբյեկտների նկատմամբ։ Այնպես չէ, որ բացելու ենք, նայենք՝ ում է պատկանում, մեկի դեպքում անենք, մյուսի դեպքում՝ ոչ։ Օրենքը գործելու է բոլորի համար, և գործնական քայլերը կսկսվեն առաջիկայում»,- ասաց Գրիգորյանը։

Մանրամասները՝ տեսանյութում