06.11.2026 | 01:59
Եվրոպա լիգա. «Արարատ-Արմենիան» ցավալի պարտություն կրեց Պորտուգալիայում. ՏԵՍԱՆՅՈՒԹ
Իրանի ԱԳՆ-ն արձագանքել է Վենսի՝ պատերազմի վերաբերյալ հայտարարություններին
Քաղաքականություն
07.09.2026 | 16:09
Իրանի ԱԳՆ խոսնակ Էսմայիլ Բաղային երկուշաբթի պատասխանել է ԱՄՆ փոխնախագահ Ջեյ Դի Վենսի հայտարարությանը, ըստ որի՝ ինքը Իրանի շուրջ ստեղծված իրավիճակը «պատերազմ» չէր անվանի, գրում է Al Arabiya-ն։
«Ես դա պատերազմ չէի անվանի։ Այս պահին ակտիվ կրակոցներ չկան»,-ասել էր Վենսը Սպիտակ տանը կայացած ճեպազրույցի ժամանակ։
Բաղային երկուշաբթի օրվա մամուլի ասուլիսում պատասխանել է, որ հակամարտությունը պատերազմ չէ, այլ «բացահայտ ագրեսիա»։ Այնուամենայնիվ, Բաղային նշել է, որ կիրակի օրը Կատարի պատվիրակությունը Իրանում էր՝ երկու երկրների միջև լարվածության թուլացմանը նպաստելու համար՝ լարվածության նորացման պայմաններում։
Իրանն ու ԱՄՆ-ը շարունակում են փոխադարձ հարվածներ հասցնել Հորմուզի նեղուցում և դրա շրջակայքում։ Երկու հակառակորդների միջև բանակցությունները փակուղի են մտել, քանի որ կողմերը պայքարում են Հորմուզի նկատմամբ վերահսկողության համար։ Նեղուցով սովորաբար անցնում է աշխարհում նավթի և հեղուկացված բնական գազի արտահանման մոտ մեկ հինգերորդը։
Բաղային զգուշացրել է, որ Իրանը կպատասխանի, եթե ՄԱԿ-ի միջուկային վերահսկող մարմինը բանաձև ընդունի իր դեմ։ Նա հավելել է, որ Իրանի դեմ ՄԱԿ-ի բանաձև ընդունել ցանկացող եվրոպական պետությունները «իռացիոնալ» են, քանի որ Միացյալ Նահանգների հետ պատերազմը միջուկային օբյեկտները դարձրել է անհասանելի։
Բացի այդ՝ Բաղային հայտարարել է, որ Իրանը և Օմանը ավարտին են հասցնում համաձայնագիրը Հորմուզի նեղուցում անվտանգ երթուղիներ որոշելու վերաբերյալ։
«Թեև որոշ փուլերում բանակցությունները բախվել են երրորդ կողմերի խոչընդոտներին և միջամտությանը, ինչի հետևանքով դրանք ուղեկցվել են վերելքներով ու անկումներով, այժմ երկու երկրների միջև խորհրդակցությունները հասել են վերջնական փուլին։Վերջնական համաձայնության ձեռքբերման դեպքում ակնկալվում է, որ Հորմուզի նեղուցում նավագնացության համար ժամանակավոր անվտանգ երթուղի ստեղծելու նպատակով Իրանի և Օմանի համատեղ փոխըմբռնման հուշագիրը առաջիկա օրերին պաշտոնապես կգրանցվի Միջազգային ծովային կազմակերպությունում»,-ասել է Իրանի ԱԳՆ խոսնակը։
Թարգմանությունը՝ Էմմա Չոբանյանի
