Մեզ մոտ մարդիկ կամավոր են մեկնում ռազմաճակատ, ի տարբերություն Ուկրաինայի․ Պուտին

Այսօրվա դրությամբ չկա  սցենար, որը կարող է պահանջել լրացուցիչ զորահավաքի իրականացում։ Դրա մասին խոսակցությունները Ռուսաստանի դեմ ուղղված ծրագրված տեղեկատվական հարձակում են՝ Պետդումայի ընտրությունների նախաշեմին։ Այս մասին  հայտարարել է ՌԴ նախագահ Վլադիմիր Պուտինը։

«Այսօրվա դրությամբ չկա  սցենար, որը կպահանջեր զորահավաք։ Սա հակառակորդի կողմից իրականացվող տեղեկատվական հարձակում է՝ Պետդումայի ընտրությունների նախաշեմին՝ արդյունքների վրա ազդելու փորձով։ Սա պարզապես ծրագրված տեղեկատվական գործողություն է», – ասել է Պուտինը՝ պատասխանելով Արևելյան տնտեսական համաժողովի լիագումար նիստի մոդերատորի հարցին։

Պուտինն ընդգծել է՝ «մեզ մոտ, ինչպես հայտնի է, մարդիկ կամավոր են մեկնում, կամավոր պայմանագիր են կնքում՝ ի տարբերություն այն ամենի, ինչ տեղի է ունենում Ուկրաինայում»։

«Մենք ամեն օր հեռուստատեսությամբ և համացանցում տեսնում ենք, թե ինչպես են Ուկրաինայում մարդկանց թափառական շների նման բռնում և ուժով ռազմաճակատ ուղարկում։ Այդ պատճառով հակառակորդի՝ ռազմական գործողություններ վարելու պատրաստվածության և մոտիվացիայի մակարդակը շատ ցածր է, իսկ դասալքողների թիվը՝ շատ մեծ», – հայտարարել է ՌԴ նախագահը։

Նա նշել է, թե իբրև «միայն դասալքության փաստով հարուցվել է ավելի քան 300 հազար պաշտոնական քրեական գործ, իսկ իրականում, իհարկե, դրանց թիվը առնվազն կես միլիոն է»։ Պուտինն ընդունել է, որ ռազմական գործողությունները «բարդ, ծանր գործ են, և, իհարկե, այստեղ բազմաթիվ խնդիրներ են առաջանում»։

«Սակայն զինծառայողների առկայության տեսանկյունից մենք այստեղ որևէ խնդիր չունենք», – ասել է ՌԴ նախագահը։

Հիշեցնենք, որ ավելի վաղ Պուտինը կրկին  հերքել էր սեպտեմբերյան խորհրդարանական ընտրություններից հետո Ռուսաստանում նոր զորահավաքի մասին տեղեկությունները։ Ռուսաստանում առաջին զորահավաքը հայտարարվել է 2022 թվականի սեպտեմբերի 21-ին։ Երկրորդ ալիքի հավանականությունը չեն բացառում Ուկրաինայի իշխանությունները և արևմտյան աղբյուրները։

Թարգմանությունը՝ Էմմա Չոբանյանի