31.08.2026 | 20:57
Ադրբեջանը կողմ է Իրանի շուրջ ստեղծված իրավիճակի խաղաղ լուծմանը․ Ալիևն ու Փեզեշքիանը հանդիպել են
Թրամփը հայտարարել է, որ ԱՄՆ-ն ուժեղ կարձագանքի իր թիրախների վրա Իրանի հարձակումներին
Քաղաքականություն
31.08.2026 | 19:44
ԱՄՆ նախագահ Դոնալդ Թրամփը հայտարարել է, որ Վաշինգտոնը պատասխան հարվածներ կհասցնի Մերձավոր Արևելքում ամերիկյան թիրախների վրա Իրանի հարձակումներին, քանի որ երկարատև դադարից հետո պատերազմը կրկին թեժացել է, հայտնում է Fox News-ը։
«Մենք նրանց շատ ուժեղ կհարվածենք։ Պատասխան կլինի»,- Fox News-ի լրագրողի հետ կարճ զրույցում հայտարարել է Թրամփը՝ նկատի ունենալով Իրանի հարձակումները, որոնք, իրենց հերթին, պատասխան էին Հորմուզի նեղուցում գտնվող իրանական կղզու ուղղությամբ ԱՄՆ-ի հասցրած հարվածներին։
Բացի այդ, Թրամփը հայտարարել է, որ Իրանը «պաշտոնապես ձախողված պետություն է», որի ղեկավարությունը հիմնվում է հորինված պնդումների վրա։
«Իրանը պաշտոնապես ձախողված պետություն է։ Այն մեռած է»,- Truth Social-ում գրել է Թրամփը՝ երկու երկրների միջև լարվածության նոր սրման ֆոնին։
Նա նաև նշել է, որ Իրանը չունի ռազմածովային և ռազմաօդային ուժեր, իսկ երկրի ազգային արժույթը ծանր վիճակում է։
«Նրանք չեն վճարում իրենց զինվորականներին և ոստիկաններին, գնաճը կազմում է 300 տոկոս, իսկ երկրի ղեկավարությունը լիակատար քաոսի մեջ է և ի վիճակի չէ պատշաճ կերպով ներկայացնել երկիրը։ Միակ բանը, ինչ նրանք ունեն, ԱՄՆ-ից եկող կեղծ լուրերն են, իրենց ցուցարարներին սպանելու պատրաստակամությունը և աբսուրդի մի ամբողջ շարք»,- գրել է Թրամփը։
Թարգմանությունը՝ Էմմա Չոբանյանի
