28.08.2026 | 15:10
Քոչարյանի վերաբերյալ գործը ՀԿԿ է ստացվել 2024-ին // ԱԲ գործիքները հասանելի կդառնան կրթական համակարգում․ ԼՈՒՐԵՐ
Հայաստանում քարտեզագրվել են գարնանային և աշնանային ցրտահարությունների ռիսկային գոտիները
28.08.2026 | 13:07
«Հիդրոօդերևութաբանության և մոնիթորինգի կենտրոնը» բազմամյա օդերևութաբանական տվյալների հիման վրա գնահատել և քարտեզագրել է վաղ աշնանային ու ուշ գարնանային ցրտահարությունների ժամկետները։ Արարատյան դաշտում ուշ գարնանային ցրտահարությունների ռիսկը հիմնականում ավարտվում է ապրիլի 2-15-ը, իսկ լեռնային և բարձրլեռնային գոտիներում դրանք կարող են դիտվել մինչև հունիսի 1-ը և ավելի ուշ։
«Ագրոկլիմայական ռիսկերի գնահատման և գյուղատնտեսական աշխատանքների պլանավորման նպատակով իրականացվել է վաղ աշնանային և ուշ գարնանային ցրտահարությունների ժամկետների վերլուծություններ և քարտեզագրում՝ օգտագործելով օդերևութաբանական կայանների բազմամյա տվյալները և աշխարհատեղեկատվական համակարգի (ԱՏՀ) գործիքները։
Տարանջատվել են ցրտահարության ռիսկային գոտիներն ու ժամանակահատվածները
Արարատյան դաշտավայրում ուշ գարնանային ցրտահարությունների ռիսկային ժամանակաշրջանը ավարտվում է համեմատաբար վաղ՝ ապրիլի 2-15-ը ընկած ժամանակահատվածում։ Այնուամենայնիվ, վաղ գարնանային վեգետացիայի պատճառով այս գոտին հատկապես զգայուն է նույնիսկ կարճատև ցրտահարությունների նկատմամբ։ Վաղ աշնանային ցրտահարությունները այստեղ հազվադեպ են և սովորաբար դիտվում են հոկտեմբերի 22-ից նոյեմբերի 2-ը կամ ավելի ուշ։
Նախալեռնային գոտիներում ուշ գարնանային ցրտահարությունների ժամկետները տեղափոխվում են ապրիլի 27-ից մայիսի 7-ը, իսկ վաղ աշնանային ցրտահարությունները սովորաբար դիտվում են հոկտեմբերի 4-22-ն ընկած ժամանակահատվածում։
Լեռնային և բարձրլեռնային գոտիներում ուշ գարնանային ցրտահարություններ կարող են դիտվել ընդհուպ մինչև հունիսի 1-ը, իսկ առավել բարձրադիր հատվածներում՝ հունիսի 1-ից հետո։ Վաղ աշնանային ցրտահարություններն այստեղ կարող են սկսվել արդեն սեպտեմբերի 15-26-ը ընկած ժամանակահատվածում։
Հայաստանում ցրտահարության ժամկետների քարտեզագրումը իրականացվել է ԱՏՀ մոդելավորման գործիքների միջոցով։
Մոդելը հաշվի է առնում տեղանքի բարդ ռելիեֆի և բարձրության ազդեցությունը՝ հնարավորություն տալով տարանջատել ցրտահարության ռիսկային գոտիներն ու դրանց բնորոշ ժամանակահատվածները»,- ասված է հաղորդագրությունում։
