09.08.2026 | 11:18
Ուկրաինան հարվածներ է հասցրել Բելգորոդին․ տուժել է 13 մարդ
Մեզ համար կարևոր է հստակեցնել ՀԱՊԿ-ի մեր գործընկերների դիրքորոշումը, մասնավորապես՝ ԼՂ հակամարտության հարցում. Փաշինյանի հարցազրույցը «Ռոսիա 24»-ին
Քաղաքականություն
05.12.2018 | 16:21
ՀԱՊԿ-ը Հայաստանի համար շատ կարևոր կազմակերպություն է, և մեր գլխավոր նպատակն է՝ բարձրացնել ՀԱՊԿ-ի հեղինակությունը ոչ միայն քաղաքական, այլև ռազմավարական առումներով: ԵՏՄ անդամ պետությունների երկրների՝ դեկտեմբերի 6-ին Սանկտ Պետերբուրգում նախանշված գագաթնաժողովից առաջ «Ռոսիա 24» հեռուստաալիքին տված հարցազրույցում այս մասին ասել է ՀՀ վարչապետի պաշտոնակատար Նիկոլ Փաշինյանը:
«Շատ մեծ ուշադրություն է կենտրոնացած ՀԱՊԿ գլխավոր քարտուղարի ընտրության հարցի ուղղությամբ: Բայց ուզում եմ ասել, որ դա սառցաբեկորի վերին հատվածն է միայն: ՀԱՊԿ գլխավոր քարտուղարի և նրա անձի հարցն ամենակարևորներից չէ: Առավել կարևոր է կազմակերպության էությունը»,- հավելել է նա:
Նա ևս մեկ անգամ ընդգծել է, որ Հայաստանի համար կարևոր նպատակ է ՀԱՊԿ-ին անդամակցությունն ավելի արդյունավետ դարձնելը. «Ինչ նկատի ունեմ. գիտեք, որ մեր տարածաշրջանում այնքան էլ հանգիստ չէ, իսկ ՀԱՊԿ-ն անվտանգության համակարգ է: ՀԱՊԿ անդամ պետությունները դե յուրե մեր ռազմավարական դաշնակիցներն են: Եվ մեզ համար շատ կարևոր է հստակեցնել փոխադարձ պարտավորությունները, այն պարտավորությունները, որոնք ՀԱՊԿ անդամներն ունեն միմյանց առջև»:
Ըստ Նիկոլ Փաշինյանի՝ ռազմատեխնիկական և ռազմավարական առումով ՀԱՊԿ-ում Հայաստանի գլխավոր գործընկերը Ռուսաստանն է, բայց մեզ համար կարևոր է հստակեցնել նաև «մյուս գործընկերների դիրքորոշումը, մասնավորապես՝ Ղարաբաղյան հակամարտության հարցում և ընդհանրապես տարածաշրջանային անվտանգության հարցում»:
«Ցավոք, երկար տարիներ մենք ունեցել ենք իրավիճակ, երբ ՀԱՊԿ շատ անդամներ միջազգային կառույցներում հաճախ քվեարկում են Հայաստանի շահերի դեմ: Խնդիրն այն է, որ մեր գործընկերները չեն կարող մեզ մեղադրել, որ մենք քվեարկում ենք իրենց շահերի դեմ: Եվ մենք ասում ենք, որ եթե մենք ռազմավարական գործընկերներ ենք, պետք է համապատասխանեցնենք մեր դիրքորոշումները»,- հավելել է նա:
