12.10.2026 | 23:18
Գազամատակարարման դադարեցումներ՝ Հայաստանի մի շարք հասցեներում
Գործող իշխանություններին ձեռնտու են բարիկադները. Արտակ Զաքարյան
Քաղաքականություն
05.12.2018 | 13:45
Գործող իշխանություններին ձեռնտու են բարիկադները: Դեկտեմբերի 5-ին հրավիրված ասուլիսում նման կարծիք հայտնեց ՀՀԿ-ից պատգամավորության թեկնածու, պաշտպանության նախկին փոխնախարար Արտակ Զաքարյանը:
«Հետո նրանք, իհարկե, կհայտարարեն, այդ բարիկադներն էլ կքանդեն, սիրո և հանդուրժողականության մասին էլ կհայտարարեն, բայց ամբողջությամբ այս գաղջ, գորշ, ատելության և անհանդուրժողականության միջավայրն իրենց ձեռնտու է, որովհետև այդպես իրենք կարողանում են հասարակության որոշ մասին անընդհատ փակ աչքերով պահել էյֆորիայի մեջ և այն տրամադրվածությամբ, որ շուտով՝ ընտրություններից հետո, ամեն ինչ փայլուն է լինելու, բացվելու են վարագույրները, և կյանքը սկսելու է փայլել մարդկանց ուրիշ տեսքով»,- հայտարարեց Զաքարյանը:
Սակայն դա, ըստ ՀՀԿ-ական գործչի, խաբկանք է. «Եվ գործող կառավարության էլեկտորատը, ցավում եմ, բայց այդ խաբկանքի առաջ է կանգնելու, ինչը, մեծ հաշվով, մեր հասարակությանը կանցնեցնելու է հիասթափության առաջ: Այսինքն՝ ոչ թե հիասթափության, նույն պրոբլեմների առաջ, որոնք պետք է լուծել»:
Արտակ Զաքարյանը ողջունում է կոռուպցիայի դեմ պայքարելու՝ գործող կառավարության մոտեցումները, բայց կարծում է, որ կոռուպցիայի դեմ քարոզչական հարթակներից չեն պայքարում:
«Դա պետք է իրականացվի բացառապես իրավունքի դաշտում, ոչ թե քաղաքական հայտարարությունների միջոցով: Կոռուպցիայի դեմ նախընտրական հարթակներից չեն պայքարում, դրա դեմ պայքարում են քննչական մարմիններում, դատարաններում և համապատասխան իրավական ընթացակարգերով»,- կարծիք հայտնեց Զաքարյանը՝ հավելելով, որ անկախ կարգավիճակից՝ պատրաստ է մինչև վերջ աջակցել այդ գործընթացին, քանի որ դա մեր կառավարման համակարգի համար մեծ խոչընդոտ է: Ինչ վերաբերում է Դավիթ Շահնազարյանի հայտարարությանը, թե Նիկոլ Փաշինյանի նպատակն է «իշխանություն՝ Արցախի դիմաց», Արտակ Զաքարյանն ասաց. «Չեմ կարծում, թե Նիկոլ Փաշինյանն ամեն օր մտածում է՝ ոնց անի, որ Արցախը հանձնի: Բայց այն գործողությունները, որ այսօր անում է ՀՀ գործող կառավարությունը, աստիճանաբար բերելու են արցախյան հիմնախնդրի լուծման գործընթացում մեր դիրքերի թուլացման և անվտանգության առումով մեծ ռիսկերի ավելացման»:
Զաքարյանը նաև կարծում է, որ գործող իշխանություններն անհասկանալի և չհիմնավորված պրոբլեմներ է ստեղծում արտաքին քաղաքական օրակարգում: «Մենք, պրոբլեմներ ստեղծելով ՀԱՊԿ-ում, ընդ որում՝ չհիմնավորված պրոբլեմներ, անհասկանալի պրոբլեմներ ստեղծելով հարևան երկրների հետ՝ ուրիշի շահերից բխող, Ռուսաստանի հետ երկխոսությունը բեղմնավոր երկխոսության բոլոր թեմաները վերածել ենք փոխադարձ անվստահության և ունենք անհասկանալի, չհիմնավորված օրակարգ արտաքին հարաբերություններում»,- հավելեց պատգամավորի թեկնածուն:
