«Պիտի աշխատենք մեր գյորա էդ օրինակները բերենք, որ հետո առողջական խնդիրներ չունենանք»․ Ասլանյան․ ՏԵՍԱՆՅՈՒԹ

Ազգային ժողովում «Ուժեղ Հայաստան» խմբակցության անունից ելույթ ունեցավ Մամիկոն Ասլանյանը։ Նրա պնդմամբ՝ վերջին օրերին բարեկրթությունը խորհրդարանում դարձել է յուրօրինակ «ապրանք», որը փորձում են վաճառել միմյանց վրա։ Նա շեշտեց, որ պատգամավորների միջև ձեռք բերված պայմանավորվածությունները նպատակ ունեին չվնասել հասարակության առանց այդ էլ ցածր մեդիակրթական մակարդակը, սակայն իրականությունն այլ է։

«Երբ ինչ-որ խոսույթների մեջ մենք այստեղ հայտնվում ենք «տերն ու ծառայի» կարգավիճակում, աղան կարծես սկսում է բարկանալ մեկս մյուսիս նկատմամբ»,- նշեց պատգամավորը։

Պատգամավորն առանձնակի անդրադարձավ ԱԺ նախագահության կողմից հնչող սպառնալիքներին՝ պատգամավորներին դահլիճից հեռացնելու վերաբերյալ։ Ըստ Ասլանյանի՝ նման լեքսիկոնը ոչ միայն անընդունելի է, այլև հակաօրինական։

«Այստեղ ոչ մեկ ոչ մեկին չի կարող ոչ դուրս շպրտել, ոչ ներս բերել։ Կներեք, այստեղ ոչ մեկի պապի կարտոլատեղը չի…»,- հայտարարեց նա՝ կոչ անելով մնալ օրինականության սահմաններում։

Անդրադառնալով հանձնաժողովների նախագահների ընտրությանը՝ Մամիկոն Ասլանյանը շեշտեց, որ ընդդիմության թեկնածուներին ձայն տալը ոչ թե մեծամասնության «բարի կամքն» է կամ «սիրո դրսևորումը», այլ Սահմանադրության պահանջը։

«Կարևոր է, որ այդ քաղաքացին, թեկնածուն լինի սահմանադրականության և պետականության գծի մեջ, և ամենևին կարևոր չէ՝ որքանով է համաձայն ներկայիս կառավարության որդեգրած գծին»,- ասաց նա։

Մանրամասները՝ տեսանյութում։

Եվգենյա Համբարձումյան