Այնքան նայեցիք անդունդին, որ անդունդն էլ նայեց ձեզ․ Արամ Վարդևանյանը՝ ՔՊ-ականներին․ ՏԵՍԱՆՅՈՒԹ

Ազգային ժողովի փոխնախագահ Արամ Վարդևանյանը խորհրդարանի ամբիոնից անդրադարձավ Դավիթ Ղազինյանի դեմ հարուցված քրեական գործին, իշխանության հռետորաբանությանը և ընտրական գործընթացներին։

Նա ներկայացրեց իր ընկերոջ և թիմակցի՝ Դավիթ Ղազինյանի դեմ հարուցված վարույթի նախապատմությունը, որի մասին վերջինս տեղեկացել էր YouTube-ից։ Պատգամավորը շեշտեց, որ Ղազինյանը, գիտակցելով իր սպասվող կալանավորումը, չի փորձել լքել երկիրը կամ խուսափել արդարադատությունից։

Ըստ Վարդևանյանի՝ սա վկայում է պատասխանատվության բարձր զգացումի մասին, մինչդեռ համակարգը նրա նկատմամբ «ոչ պատշաճ վարքագծի ռիսկ» է տեսել։

Անդրադառնալով իշխանական պատգամավորների կողմից օգտագործվող «թքած ունենալ» արտահայտությանը՝ Վարդևանյանը հորդորեց զերծ մնալ նման խոսույթից՝ հիշեցնելով պատերազմի ծանր հետևանքները․ «Դուք գիտակցում եք, չէ՞, որ մարդիկ կարող են լինել, որոնք հիշեն, օրինակ՝ մեր զոհված հերոսների դիակները, մասունքները սառնարանում՝ գետնին գցված»։

Ելույթի ավարտին պատգամավորը մեղադրեց իշխանություններին նույն այն արատավոր երևույթները որդեգրելու համար, որոնք ժամանակին քննադատում էին․ «Այնքան նայեցիք անդունդին, որ անդունդն էլ նայեց ձեզ, ու դուք գնալով ստանձնեցիք ընտրախախտումների ակնհայտ իրացման պատասխանատվություն»։

Անդունդի վերաբերյալ խոսքերը պատկանում են Ֆրիդրիխ Նիցշեին՝ նրա «Բարուց և չարից անդին» գրքից։ Հեղինակը կարծում է, որ երբ մարդը երկար ժամանակ առնչվում է մթության, չարության, բռնության, վախի կամ այլ ծանր երևույթների հետ, դրանք կարող են սկսել փոխել հենց իրեն։

Մանրամասները՝ տեսանյութում։

Եվգենյա Համբարձումյան