Ռուսական համարներ չի եղել, Լատվիայի հյուպատոսի համարներն է եղել. Դավիթ Ղազինյան. ՏԵՍԱՆՅՈՒԹ

Ազգային ժողովում տարածքային կառավարման և շրջակա միջավայրի պահպանության հարցերի մշտական հանձնաժողովի նախագահի թեկնածու Դավիթ Ղազինյանի ընտրության ժամանակ ՔՊ պատգամավոր Միքայել Խաչատրյանը թեկնածուին մեղադրել է հարցերը «լղոզելու» և ՀԷՑ-ում աշխատած տարիներին անարդյունավետ կառավարման համար։

Միքայել Խաչատրյանը բարձրացրել է ՀԷՑ-ի սպասարկման կենտրոնների հարցը, որոնք վարձակալված են եղել «Տաշիր» և «Ռիո» մոլերում։ Ըստ պատգամավորի՝ նոր կառավարչի օրոք այդ պայմանագրերը խզվել են՝ հօգուտ ավելի էժան կամ անհատույց տարածքների։

Ի պատասխան՝ Դավիթ Ղազինյանը նշել է, որ մոլերում տեղակայված լինելը բխել է քաղաքացիների հարմարավետությունից, քանի որ այնտեղ օրական 10,000-15,000 մարդ է մտնում։ Տնտեսական արդյունավետության մասով նա շեշտել է. «Կորուստները մոտավորապես 14%-ից իջել են 6%-ի… և ամեն տոկոսը դա միլիոնավոր դոլարներ են»։

Նա հավելել է, որ 200-300 հազար դրամի վարձավճարի տարբերությունը «Կարապետյաններին անհրաժեշտ չէ»։

Միքայել Խաչատրյանը հետաքրքրվել է, թե ինչու է պատգամավորի թեկնածուն շրջել Ռուսաստանի դեսպանատան բալանսում գտնվող կարմիր համարներով։ Ղազինյանը հերքել է ռուսական կողմի հետ որևէ կապ և արել «դարակազմիկ» հայտարարություն. «Այդ համարները եղել են Լատվիայի պատվո հյուպատոսության համարներ, դրա համար էլ եվրաինտեգրված ենք եղել»։

Ըստ Ղազինյանի՝ մեքենան պատկանել է իր ընկերոջը՝ հյուպատոսին, և իրենք պարզապես մեքենաներով փոխանակվել են։

Մանրամասները՝ տեսանյութում։

Եվգենյա Համբարձումյան