14.08.2026 | 19:00
ԱՄՆ-ն Իրանին սպառնացել է տնտեսական ճնշման ուժգնացմամբ
496 ապօրինի հատված ծառ՝ 114.7 մլն դրամի վնաս «Թումանյանի անտառտնտեսություն»-ում․ ԲԸՏՄ-ն հաղորդում է ներկայացրել ՀՀ ՔԿ
Քաղաքականություն
14.08.2026 | 16:44
Բնապահպանության և ընդերքի տեսչական մարմինը «Հայանտառ» ՊՈԱԿ-ի «Թումանյանի անտառտնտեսություն» մասնաճյուղում ստուգմամբ բազմաթիվ խախտումներ է հայտնաբերել։ Ստուգումն ընդգրկել է 2022 թվականի նոյեմբերից մինչև 2026 թվականի հունիսն ընկած ժամանակահատվածը։
Ըստ ԲԸՏՄ-ի՝ արձանագրվել է տարբեր տեսակի և տրամագծերի 496 ապօրինի հատված ծառ։ Բուսական աշխարհին պատճառված վնասը կազմել է 114 մլն 686 հազար 928 դրամ։
Տեսչական մարմնի տվյալներով՝ անտառահատումներն իրականացվել են առանց լիազորված մարմնի համաձայնության և բնապահպանական փորձաքննության դրական եզրակացության։
Բացի այդ, կառուցվել է ընդհանուր 8320 քմ մակերեսով ճանապարհ, առանց սահմանված կարգով նախագծերի համաձայնեցման, շրջակա միջավայրի ազդեցության գնահատման դրական եզրակացության և լիազոր մարմնի համաձայնության։
Ստուգմամբ արձանագրվել են նաև անտառահատման տոմսերի և անտառաշինական նախագծերի տվյալների անհամապատասխանություններ, ինչպես նաև համատարած անտառահատման ենթարկված տարածքներում անտառվերականգնման աշխատանքների չիրականացում և հատատեղերից փայտանյութի մնացորդների չհեռացում։
Առերևույթ հանցանքի հատկանիշներ պարունակող դեպքերի վերաբերյալ ԲԸՏՄ-ն հաղորդում է ներկայացրել ՀՀ քննչական կոմիտե։ Մյուս խախտումների մասով կկիրառվեն օրենքով սահմանված վարչական պատասխանատվության միջոցներ։
