Մեծ Բրիտանիան պատժամիջոցներ է կիրառել ռուսական բանկերի, այդ թվում՝ «Օզոն Բանկի» նկատմամբ

Մեծ Բրիտանիան ընդլայնել է Ռուսաստանի դեմ պատժամիջոցների ցանկը՝ ավելացնելով 19 նոր կետ։ Պատժամիջոցների տակ են հայտնվել վեց ֆինանսական հաստատություններ՝ «Օզոն Բանկ»-ը, «ՏելեՊորտ Բանկ»-ը, «Էքսիմբանկ Ռոսիա»-ն, «Ցենտր-Ինվեսթ»-ը, «Ռեալիստ Բանկ»-ը և «Ստավր Բանկ»-ը, ինչպես նաև «Սևերնի Ինժեներինգ» նավաշինական ընկերությունը և «ՄետալԿոմպլեկտ», «ՆԻԿՈՄ», «Պրոմսիզ» ու «Տեխնոլյուքս» ընկերությունները։

Ֆիզիկական անձանց թվում է Ալեքսանդր Ժդանովը, որը քիմիական արդյունաբերության ոլորտում գործող «Սիլտրոն» ընկերության սեփականատերն է։

Բացի այդ՝ պատժամիջոցներ են կիրառվել Հնդկաստանի ծովային լոգիստիկ Frion Ship Management ընկերության, ինչպես նաև մեկ գազատարի և հինգ նավթային՝ Arctic Express, Perseas, Torvian, Asteras, Visund և  Zenturo լցանավերի նկատմամբ։

Մեծ Բրիտանիան աշխարհում առաջին երկիրն էր, որը սկսել է պատժամիջոցներ կիրառել ռուսական հեղուկ բնական գազ տեղափոխող նավերի նկատմամբ: Հունիսի կեսերին Լոնդոնը պատժամիջոցների ցանկին ավելացրել է հեղուկ բնական գազի երեք նավ (Mercury, Luch և Kosmos) և 24 լցանավ: Այս պատժամիջոցների փաթեթը, ըստ տեղեկությունների, ուղղված էր Ռուսաստանի «ստվերային նավատորմին» և ֆինանսական ցանցերին, որոնք օգտագործվում են պատժամիջոցները շրջանցելու և ռազմական գնումներին աջակցելու համար։

Ըստ Financial Times-ի՝ Ռուսաստանը ներկայում ընդլայնում է իր «ստվերային նավատորմը» հեղուկ բնական գազ տեղափոխելու համար՝ նախապատրաստվելով 2027 թվականին ուժի մեջ մտնող ռուսական գազի ներմուծման ԵՄ-ի արգելքին. վերջին վեց ամիսների ընթացքում ձեռք է բերվել առնվազն ութ գազ փոխադրող նավ։

Թարգմանությունը՝ Էմմա Չոբանյանի