ԵՄ-ն ՀՀ-ից կպահանջի՞ ՌԴ քաղաքացիների համար վիզային ռեժիմ մտցնել․ Եվրահանձնաժողովի խոսնակի պարզաբանումը․ ՏԵՍԱՆՅՈՒԹ

Արդյո՞ք Եվրամիությունը ճնշում կգործադրի Հայաստանի վրա՝ ստիպելով վիզային ռեժիմ սահմանել ՌԴ քաղաքացիների համար, արդյո՞ք նման քննարկումներ եղել են հայ պաշտոնյաների հետ․ ամենօրյա բրիֆինգի ժամանակ այս հարցադրումներն ուղղվեցին Եվրահանձնաժողովի խոսնակ Գիյոմ Մերսիեին Եվրախորհրդարանի պատգամավոր Ֆեռնարդ Կարթեյզերի հայտարարությունից հետո։ Պատգամավորն ակնարկել էր, որ Հայաստանը, անկախ տնտեսական ու ֆինանսական հետևանքներից, ստիպված կլինի միանալ ՌԴ-ի դեմ պատժամիջոցներին՝ ԵՄ անդամակցության հայտ ներկայացնելու դեպքում։

«Երբ խոսքը վերաբերում է անդամակցության գործընթացի քննարկմանը, կարևոր է շեշտել, որ Հայաստանն այսօր, առավել քան երբևէ, մոտ է ԵՄ-ին։ Մի քանի շաբաթ առաջ տեղի ունեցած ԵՄ-Հայաստան առաջին գագաթնաժողովն իրական հաջողություն էր։ Ի հավելումն դիմակայունության և աճի ծրագրի, Խաղաղության եվրոպական հիմնադրամի ու գործընկերության առաքելությունների շրջանակներում առկա գերազանց համագործակցության՝ Հայաստանը ևս մեկ քայլ կատարեց դեպի ԵՄ՝ ընդունելով, այսպես կոչված, «ԵՄ օրինագիծը»։ Սա իսկապես կարևոր խորհրդանշական քայլ է»,- ասաց Գիյոմ Մերսիեն։

Նրա խոսքով՝ ԵՄ անդամակցությունը հստակ սահմանված և արժանիքների վրա հիմնված գործընթաց է, որը պահանջում է պաշտոնական հայտ անդամակցության ձգտող երկրի կողմից։

«Այժմ մենք սերտորեն աշխատում ենք Հայաստանի հետ՝ այն ԵՄ-ին ավելի մոտեցնելու ուղղությամբ, ներառյալ այնպիսի ոլորտներ, ինչպիսիք են կապուղիները, առևտուրը և շատ ավելին»,- եզրափակեց նա՝ այդպես էլ չպատասխանելով բուն հարցին։

Կարինե Ասատրյան, Բրյուսել