Էրդողանը հայտարարել է, որ Անկարայում ՆԱՏՕ-ի գագաթնաժողովում հնարավոր է Թրամփի հետ անձնական հանդիպում

Թուրքիայի նախագահ Ռեջեփ Թայիփ Էրդողանը հայտարարել է, որ ԱՄՆ նախագահ Դոնալդ Թրամփի հետ անձնական հանդիպումը, հավանաբար, կկայանա հաջորդ ամիս՝ Անկարայում կայանալիք ՆԱՏՕ-ի գագաթնաժողովի ժամանակ, ինչը հիմք կհանդիսանա առաջնորդների միջև անձնական քննարկման համար, քանի որ Թուրքիան պատրաստվում է հյուրընկալել դաշինքի տարեկան հավաքը։

«Արդարություն և զարգացում» կուսակցության խորհրդարանական խմբակցության նիստից հետո Էրդողանը լրագրողներին ասել է, որ մեծ հավանականություն կա, որ ինքը և Թրամփը անձնական բանակցություններ կանցկացնեն գագաթնաժողովի շրջանակում, որը հուլիսի 7-8-ը ՆԱՏՕ-ի առաջնորդներին կհավաքի Թուրքիայի մայրաքաղաքում։ Սպասվող հանդիպումը տեղի է ունենում այն ​​ժամանակ, երբ Վաշինգտոնն ու Անկարան երկխոսություն են պահպանում տարածաշրջանային և անվտանգության մի շարք հարցերի շուրջ, մինչդեռ ՆԱՏՕ-ի անդամները պատրաստվում են դաշինքի առաջնորդների 36-րդ գագաթնաժողովին։

Թրամփն արդեն իսկ ազդարարել է, որ կմասնակցի հավաքին։

«Ես շուտով կմեկնեմ Թուրքիա»,- նշել է նա։

Սա Թրամփի առաջին պաշտոնական այցը կլինի Թուրքիա։ Վերջին անգամ նա Ռեջեփ Թայիփ Էրդողանի հետ հանդիպել է Վաշինգտոնում՝ 2025 թվականի սեպտեմբերին։

ԱՄՆ պետքարտուղար Մարկո Ռուբիոն ավելի վաղ հաստատել էր Թրամփի մասնակցությունը։

«Նախագահ Դոնալդ Թրամփը կմասնակցի ՆԱՏՕ-ի գագաթնաժողովին Թուրքիայում։ Սա դաշինքի պատմության մեջ ամենակարևոր հանդիպումը կլինի», – ասել էր Ռուբիոն։

ՆԱՏՕ-ի առաջնորդների գագաթնաժողովը տեղի է ունենում դաշինքի համար զգայուն պահին, քանի որ ակտիվանում են քննարկումները պաշտպանական ծախսերի, ռազմական պատրաստվածության, Ուկրաինային աջակցության և ԱՄՆ-ի ու եվրոպացի դաշնակիցների միջև անվտանգության պատասխանատվության ապագա բաշխման վերաբերյալ։

Թարգմանությունը՝ Էմմա Չոբանյանի