03.11.2026 | 23:29
Թրամփը հայտարարել է, որ ԱՄՆ-ը կդադարեցնի Իսրայելին տարեկան 4 միլիարդ դոլարի օգնության տրամադրումը
Քաղաքապետարանից պայմանագիրը լուծարելու ծանուցագիր են ստացել․ Իվետա Տոնոյանը՝ Multi Wellness-ի մասին․ ՏԵՍԱՆՅՈՒԹ
Հասարակություն
19.06.2026 | 18:18
ԲՀԿ խոսնակ Իվետա Տոնոյանը հայտարարել է, որ կուսակցությունում դեռ պաշտոնական դիրքորոշում չեն ձևավորել «Ուժեղ Հայաստան» կուսակցության առաջնորդ Սամվել Կարապետյանի՝ ընդդիմադիր ուժերի համախմբման կոչի վերաբերյալ։
Նրա խոսքով՝ Կարապետյանի հայտարարության մասին տեղեկացել են լրատվամիջոցներից և առայժմ հնարավորություն չի եղել հարցը քննարկել ԲՀԿ նախագահ Գագիկ Ծառուկյանի հետ։
«Նախորդող ժամանակահատվածում քաղաքական թիմերի անդամներով բավականին կառուցողական քննարկումներ ենք ունեցել մի շարք ընդդիմադիր կուսակցությունների, այդ թվում նաև «Ուժեղ Հայաստանի» մեր գործընկերների հետ։ Սակայն պարոն Կարապետյանի առաջարկած օրակարգի շուրջ համախմբվելու հարցի հետ կապված այս պահին պաշտոնական դիրքորոշում չեմ կարող փոխանցել»,- ասել է Տոնոյանը՝ հավելելով, որ հարգանքով են վերաբերվում առաջարկին։
Անդրադառնալով Սահմանադրական դատարանում ընտրությունների արդյունքների վիճարկման գործընթացին՝ ԲՀԿ խոսնակը նշել է, որ կուսակցությունը սպասում է դատարանի որոշմանը և առայժմ չի ցանկանում խոսել հետագա քայլերի մասին։
«Նպատակը բոլոր հնարավոր իրավական գործիքներն օգտագործելով մարդկանց ընտրելու իրավունքի վերականգնումն է։ Սպասենք Սահմանադրական դատարանի քննությանը, որից հետո արդեն կխոսենք հետագա անելիքների մասին»,- նշել է նա։
Տոնոյանը նաև մեկնաբանել է տեղեկությունները, ըստ որոնց՝ Երևանի քաղաքապետարանը «Մուլտի Վելնես» ընկերությանը ծանուցել է պայմանագիրը միակողմանի լուծելու մասին։ Նրա խոսքով՝ ընկերությունը, որը ներառված է «Մուլտի Գրուպ» կոնցեռնի կազմում, ստացել է համապատասխան ծանուցում, թեև պայմանագիրը գործում է մինչև 2065 թվականը։
«Առանց որևէ հիմնավորում ներկայացնելու Երևանի քաղաքապետարանը որոշել է միակողմանի լուծել պայմանագիրը՝ մեկ ամիս առաջ այդ մասին տեղեկացնելով ընկերությանը։ Իրավաբաններն արդեն ներկայացրել են իրենց առարկությունները և գործընթացը շարունակվելու է իրավական ճանապարհով»,- ասել է Տոնոյանը։
Նա պնդել է, որ որոշումն ունի քաղաքական ենթատեքստ և իշխանությունները վարչական ռեսուրսներն օգտագործում են ընդդիմադիր գործիչների նկատմամբ ճնշումներ գործադրելու նպատակով։ ԲՀԿ խոսնակի խոսքով՝ վերջին օրերին «Մուլտի Գրուպ» կոնցեռնի կազմում ընդգրկված մի շարք ընկերություններում իրականացվում են հարկային ստուգումներ և այլ գործընթացներ, իսկ «Մուլտի Վելնեսը» այդ ընկերություններից միայն մեկն է։
Մանրամասները՝ տեսանյութում։
