Եվրախորհրդարանն ընդունել է Վրաստանի մասով զեկույցը և կոչ արել սառեցնել Բիձինա Իվանիշվիլիի ակտիվները

Եվրախորհրդարանն ընդունել է Վրաստանի վերաբերյալ զեկույցը, որում ընդգծվում է, որ  իշխող «Վրացական երազանք» կուսակցության հիմնադիր Բիձինա Իվանիշվիլիի, կուսակցության առաջնորդների, դատավորների, դատախազների և այլ պաշտոնյաների նկատմամբ անձնական պատժամիջոցները կարևոր գործիք են անպատժելիության դեմ պայքարում։ Եվրախորհրդարանը ողջունել է այն փաստը, որ ԵՄ մակարդակով միաձայնության բացակայության պայմաններում ավելի ու ավելի շատ անդամ պետություններ ինքնուրույն վիզային սահմանափակումներ և այլ պատժամիջոցներ են սահմանում վրացի պաշտոնյաների դեմ՝ ԵՄ մյուս երկրներին կոչ անելով հետևել նրանց օրինակին։

Փաստաթղթում վերահաստատվում է Եվրամիությանը և նրա անդամ պետություններին ուղղված կոչը՝ անհապաղ թիրախային անձնական պատժամիջոցներ կիրառել Բիձինա Իվանիշվիլիի, նրա ընտանիքի անդամների և նրա ընկերությունների նկատմամբ։

Բացի այդ, Եվրախորհրդարանը կոչ է արել սառեցնել Իվանիշվիլիի ակտիվները, համագործակցել այլ իրավասությունների հետ այս հարցում, մասնավորապեսմ Միացյալ Թագավորության և Միացյալ Նահանգների, ընդլայնել պատժամիջոցների ցուցակներն այն անձանց նկատմամբ, ովքեր պատասխանատու են ժողովրդավարական հետընթացի, ընտրակեղծիքների, մարդու իրավունքների լուրջ խախտումների և Վրաստանում քաղաքական հակառակորդների ու ակտիվիստների հետապնդման համար։

Զեկույցում նշվում է, որ պատժամիջոցները պետք է կիրառվեն ոչ միայն պաշտոնյաների, այլև այն ընկերությունների և լրատվամիջոցների սեփականատերերի նկատմամբ, որոնք, ըստ Եվրախորհրդարանի, նպաստում են իշխող կուսակցության գործողություններին։

Եվրոպական խորհրդարանը դատապարտել է քաղաքական բռնաճնշումների, լրագրողների և մարդու իրավունքների պաշտպանների նկատմամբ ճնշման, ինչպես նաև ընդդիմության անդամների հետապնդման համար պատասխանատու պաշտոնյաների և պետական ​​հաստատությունների համակարգային անպատժելիությունը։

Փաստաթղթում հատուկ նշվում է, որ Վրաստանում ընթացող գործընթացներին Եվրամիության արձագանքը մնում է անբավարար և ուշացած՝ այն ֆոնին, ինչը զեկույցի հեղինակները համարում են իշխանության ավտորիտար կոնսոլիդացիայի արագացում։ Եվրոպական խորհրդարանը կոչ է արել ԵՄ Խորհրդին և անդամ պետություններին անհապաղ համակարգված սահմանափակող միջոցներ ձեռնարկել ԵՄ-ի մակարդակով բոլոր այն քաղաքական գործիչների, պաշտոնյաների և անհատների նկատմամբ, որոնք, ենթադրաբար, նպաստում են պետական ​​հաստատությունների զավթմանը, ճնշումներին և ռեժիմի կողմից հովանավորվող քարոզչությանը։

Զեկույցը նաև կոչ է անում Հունգարիայի կառավարությանը՝ վերացնել Իվանիշվիլիի և «Վրացական երազանքի» ղեկավարության դեմ համաեվրոպական պատժամիջոցների ներդրման արգելափակումը և խորհուրդ է տալիս ԵՄ Խորհրդին դիտարկել որոշումների կայացման մեխանիզմներ այն դեպքերում, երբ անդամ պետությունների միջև միաձայնությունը հնարավոր չէ։

Թարգմանությունը՝ Էմմա Չոբանյանի